فوتو: ەۆگەني موروزوۆ
ەكىنشى جىل قاتارىنان ءوتىپ جاتقان Halyk OIY Tech IT-كونفەرەنتسياسى اقپاراتتىق تەحنولوگيالار، جاساندى ينتەللەكت، دەرەكتەردى تالداۋ جانە تسيفرلىق ونىمدەر سالاسىندا جۇمىس ىستەيتىن 500 مامان جينادى. ءىس-شارا اياسىندا ماماندار قانداي سۇراقتاردى تالقىلاعانى تۋرالى – تولىعىراق ماتەريالدا.
Halyk OIY Tech IT-كونفەرەنتسياسىن ۇيىمداستىرۋشى – Halyk Bank, ال ونىڭ باس سەرىكتەسى – حالىقارالىق Visa تولەم جۇيەسى. بيىل كونفەرەنتسياعا بانك ماماندارىمەن قاتار Visa, Amazon Web Services, Plug and Play جانە Ymatrix كومپانيالارىنىڭ وكىلدەرى قاتىستى.
جاساندى ينتەللەكت مۇمكىندىكتەرى – باستى فوكۋستا
جيىندا 30 سپيكەر بايانداما جاساپ، بانك سالاسىنداعى تەحنولوگيالىق وزگەرىستەر مەن حالىقارالىق تاجىريبە تۋرالى پىكىر الماستى. اتاپ ايتقاندا، بانك جۇيەسىنە جاساندى ينتەللەكتىنى ەنگىزۋ، الاياقتىقپەن كۇرەسۋ، كليەنتتەرگە قىزمەت كورسەتۋدى جەتىلدىرۋ جانە قارجى سالاسىنداعى تەحنولوگيالاردىڭ بولاشاعى تالقىلاندى.
باسىمدىق – جاساندى ينتەللەكتىنىڭ بانك جۇمىسىنداعى مۇمكىندىكتەرىنە بەرىلدى.
جاساندى ينتەللەكت بانكتىڭ قاي باعىتتارىندا قولدانىلاتىنىن Halyk Bank باسقارما توراعاسىنىڭ ورىنباسارى، تاۋەكەل-مەنەدجمەنت باسشىسى رومان ماشچىك ءتۇسىندىردى. ونىڭ ايتۋىنشا، Halyk جي-ءدى ءۇش باعىتتا قولدانادى. اتاپ ايتقاندا، نەسيە بەرۋ كەزىندە دەرەكتەردى تالداۋ، بانك ىشىندەگى جۇمىستى جەڭىلدەتۋ جانە تاپسىرمالاردى وزدىگىنەن ورىنداي الاتىن جاساندى ينتەللەكت اگەنتتەردى دامىتۋ.
جاڭا تسيفرلىق كومەكشى كليەنتتەرگە قالاي كومەكتەسە الادى
بانك كليەنتتەرىنە ارنالعان جاڭا تسيفرلىق كومەكشىنى Halyk باسقارما توراعاسىنىڭ ورىنباسارى كيريل باچۆاروۆ تانىستىرىپ ءوتتى. “قازىر تسيفرلىق كومەكشىنىڭ ەكى نەگىزگى قىزمەتى جۇمىس ىستەيدى. ءبىرىنشىسى – پايدالانۋشىلاردىڭ سۇراقتارىنا جاۋاپ بەرۋ. ەكىنشىسى – تەلەفوننىڭ بايلانىس تىزىمىندەگى ادامعا اقشا اۋدارۋ. مىسالى، كليەنت “جۇبايىما اقشا اۋدار” دەپ تاپسىرما بەرە الادى”، – دەدى كيريل باچۆاروۆ.
ونىڭ ايتۋىنشا، تسيفرلىق كومەكشى بانك قىزمەتتەرىنە قول جەتكىزۋدى ەداۋىر جەڭىلدەتۋگە مۇمكىندىك بەرەدى. بۇگىندە كوپتەگەن ءموبيلدى قوسىمشادا قاجەتتى قىزمەتتى تابۋ ءۇشىن بىرنەشە ءبولىمدى اشىپ، بىرقاتار ارەكەتتى ورىنداۋ قاجەت. ال تسيفرلىق اگەنت بۇل قادامداردى قىسقارتادى.
جي اگەنتتەر وپەراتسيالاردى جەدەلتەدى
Halyk دەرەكتەر ءوفيسىنىڭ باسشىسى رۇستەم مۇراتبەكوۆتىڭ ايتۋى بويىنشا، جاڭا تەحنولوگيالار ارقاسىندا بانكتىڭ ىشكى جۇمىس پروتسەستەرى دە وزگەرىپ جاتىر. بانك ىشىندە بيزنەس پروتسەسىنە كومەكتەسەتىن 70-تەن استام جاساندى ينتەللەكت اگەنتى بار.
“بۇرىن ءبىر تەحنولوگيادان ەكىنشىسىنە كوشۋ ءۇشىن ءبىر نەمەسە ءبىر جارىم جىل قاجەت بولاتىن ەدى. قازىر مۇنداي جۇمىستى ەكى-ءۇش ايدا اياقتاۋعا مۇمكىندىك بار. وعان جاساندى ينتەللەكتىنىڭ كومەگىمەن اقپاراتتى جىلدام تالداۋ، مامانداردىڭ جۇمىسىن جەڭىلدەتۋ جانە كەيبىر پروتسەستەردى اۆتوماتتاندىرۋ ىقپال ەتەدى”، – دەدى رۇستەم مۇراتبەكوۆ.
ونىڭ سوزىنشە، تەحنولوگيالىق ترانسفورماتسيانىڭ نەگىزگى مىندەتتەرىنىڭ ءبىرى – بانكتە جيناقتالعان تاجىريبە مەن ءبىلىمدى كوپشىلىككە قولجەتىمدى ەتۋ. بۇل رەتتە كونفەرەنتسيا IT سالاسىنىڭ ماماندارى مەن ستۋدەنتتەرگە نارىقتاعى جاڭا ۇردىستەردى زەردەلەپ، تىڭ جوبالار مەن ازىرلەمەلەر تۋرالى بىلۋگە جول اشادى.
Halyk OIY Tech كونفەرەنتسياسى العاش رەت 2025 جىلى ۇيىمداستىرىلدى.
