قىتاي قورعانىس ءمينيسترى لي شانفۋ 4 ماۋسىمدا سينگاپۋردە وتكەن شانگري-لا قاۋىپسىزدىك فورۋمىندا حالىقارالىق اۋديتوريا الدىندا اقش، تايۆان، ۋكراينا تۋرالى ايتىپ، اقش-تى سىنادى. بۇل تۋرالى DW باسىلىمى جاريالادى، دەپ حابارلايدى “ادىرنا” ۇلتتىق پورتالى.
ول قىتاي مەن اقش جۇيەلەرىنىڭ ارتۇرلىگىنە جانە باسقا دا كوپتەگەن اسپەكتىلەردە ەرەكشەلەنەتىنىنە توقتالدى. سونداي-اق، قىتاي مەن اقش ارسىندا قاقتىعىس بولسا الەم ءۇشىن توزگىسىز اپات ورىن الاتىنىن العا تارتتى.
بىراق بۇل ەكىجاقتى بايلانىستاردى دامىتۋ جانە ىنتىماقتاستىقتى تەرەڭدەتۋ ءۇشىن ورتاق ءتىل تابۋعا كەدەرگى بولماۋى كەرەك. قىتاي مەن اقش اراسىندا كۇردەلى قاقتىعىس نەمەسە قاراما-قايشىلىق بولسا بۇل الەم ءۇشىن توزگىسىز اپاتقا اينالادى، - دەدى ول.
لي قىتايدىڭ اقش-قا قارسى شاعىمدارى بار ەكەنىن دە ايتا كەتتى.
ۇلى ەل ءوز مۇددەسى ءۇشىن بلوكتىق قاقتىعىستى تۋدىرماۋى كەرەك، سوعان سايكەس ارەكەت ەتۋى كەرەك،- دەدى قىتايدىڭ قورعانىس ءمينيسترى.
سونىمەن قاتار، قىتاي ءمينيسترى تايۆان تۋرالى دا ايتا كەتتى. ول قىتاي تايۆاندى باقىلاۋعا الۋدى "ۇلتتىق جاڭعىرۋ" ماسەلەسى رەتىندە قاراستىراتىنىن العا تارتتى.
تايۆان - قىتايلىق تايۆان، ال تايۆان ماسەلەسىن قالاي شەشۋ قىتايدىڭ ءوز ەركى. ەگەر تايۆاندى قىتايدان بىرەۋ ءبولىپ الماق بولسا، قىتاي اسكەرى ءبىر سەكۋندقا دا تارتىنبايدى، - دەدى ول.
لي ۋكرايناداعى سوعىس تۋرالى دا ءسوز قوزعادى. قىتايدىڭ قورعانىس ءمينيسترى بەيجىڭ بەيبىت كەلىسسوزدەردى جەڭىلدەتۋ ءۇشىن بار كۇش-جىگەرىن سالىپ جاتقانىن جانە سوعىس قيمىلدارىنىڭ تەزىرەك توقتاتىلۋىنا ۇمىتتەنەتىنىن ايتتى.
