Qazaqstan, Özbekstan, Qyrǧyzstan jäne Türıkmenstan Resei prezidentı Vladimir Putinnıŋ Novgorod oblysyndaǧy rezidensiiasyna jasalǧan şabuyl äreketın qataŋ aiyptady, dep habarlaidy "Adyrna" ūlttyq portaly.
Qazaqstan Prezidentı Qasym-Jomart Toqaev ta Vladimir Putinmen telefon arqyly söilesu barysynda rezidensiiaǧa jasalǧan şabuyl äreketın aiyptady. Aqordanyŋ habarlauynşa, Toqaev mūndai äreketterdıŋ beibıt üderıstı ılgerıletuge jäne qaqtyǧysty saiasi jolmen şeşuge yqpal etpeitının atap öttı. Sonymen qatar, ol Ukraina mäselesı boiynşa kelıssözderde baiqalǧan ılgerıleudı oŋ baǧalap, tūraqty kelısımderge qol jetkızu üşın saiasi-diplomatiialyq küş-jıgerdı jalǧastyrudyŋ maŋyzyn aitty. Äŋgıme barysynda ekıjaqty yntymaqtastyqtyŋ qazırgı jaǧdaiy talqylanyp, ötıp bara jatqan jyldyŋ qazaq-resei qatynastary üşın mazmūndy ärı nätijelı bolǧany atap ötıldı.
Özbekstan prezidentı Şavkat Mirziioev Resei basşysy Vladimir Putinmen 30 jeltoqsanda ötken telefon arqyly äŋgıme barysynda atalǧan oqiǧaǧa qatysty öz ūstanymyn bıldırdı. Äŋgıme soŋynda ekı el basşylary bır-bırın jäne halyqtaryn kele jatqan 2026 jylmen qūttyqtady.
Qyrǧyzstan prezidentı Sadyr Japarov ta atalǧan oqiǧaǧa qatysty alaŋdauşylyq bıldırdı. Onyŋ baspasöz hatşysy Asqat Alagözovtyŋ aituynşa, memleket basşysy mūndai jaǧdailar Ukrainadaǧy daǧdarysty saiasi-diplomatiialyq jolmen retteuge baǧyttalǧan küş-jıgerge qauıp töndıruı mümkın ekenın atap ötken.
Türıkmenstan da būl jaǧdaiǧa qatysty öz ūstanymyn bıldırdı. Türıkmenstan syrtqy ıster ministrlıgı taratqan mälımdemede Resei prezidentınıŋ rezidensiiasyna jasalǧan şabuyl turaly habarlarǧa bailanysty alaŋdauşylyq bıldırılıp, halyqaralyq qauıpsızdık pen tūraqtylyqqa qater töndıretın mūndai äreketter aiyptalatyny aitylǧan.
Būǧan deiın Reseidıŋ syrtqy ıster ministrı Sergei Lavrov 28-29 jeltoqsanǧa qaraǧan tünı Ukraina tarapynan Resei prezidentınıŋ Novgorod oblysyndaǧy rezidensiiasyna drondar arqyly şabuyl jasau äreketı bolǧanyn mälımdegen edı. Onyŋ aituynşa, şabuylǧa 91 ūşqyşsyz ūşu apparaty qatysqan. Olardyŋ barlyǧy äue şabuylyna qarsy qorǧanys küşterımen joiylǧan.
Alaida Batys elderı būl mälımdemege kümänmen qarauda. AQŞ-tyŋ NATO janyndaǧy tūraqty ökılı Mettiu Uitaker şabuyldyŋ bolǧan-bolmaǧany naqty emes ekenın aityp, Vaşington barlau qyzmetterınen aqparat kütıp otyrǧanyn jetkızdı.
Aita keteiık, Ukraina bilıgı şabuyldy rastaityn eşqandai derek ūsynylmaǧanyn habarlaǧan.
