قىسقى وليمپيادا ويىندارىنىڭ دايىندىعىنا 13,3 ميلليارد تەڭگە ءبولىندى. بۇل تۋرالى تۋريزم جانە سپورت ءمينيسترى ەربول مىرزابوسىنوۆ ايتتى، دەپ حابارلايدى «ادىرنا» ءتىلشىسى.
ءمينيستردىڭ مالىمدەۋىنشە، قازاقستان قۇراماسى الداعى وليمپيادا ويىندارىنا سپورتتىڭ 10 ءتۇرى بويىنشا 98 ليتسەنزيا الۋدى كوزدەپ وتىر. اتلەتتەردى جوعارى دەڭگەيدە دايىنداۋ ماقساتىندا رەسپۋبليكالىق جانە جەرگىلىكتى بيۋدجەتتەردەن ەداۋىر كولەمدە قارجى بولىنگەن.
«جالپى قارجىلاندىرۋ كولەمى 13,3 ملرد تەڭگەگە جەتتى. ونىڭ ىشىندە 585 ملن تەڭگە سپورت فەدەراتسيالارىنىڭ قاراجاتى بولسا، 5,3 ملرد تەڭگە رەسپۋبليكالىق بيۋدجەتتەن، 6,2 ملرد تەڭگە جەرگىلىكتى بيۋدجەتتەردەن، ال 1,2 ملرد تەڭگە تۋريزم جانە سپورتتى قولداۋ قورىنان قاراستىرىلدى»، – دەدى مينيستر.
سونداي-اق سپورتشىلاردى دايىنداۋ ءۇشىن مينيسترلىك گەرمانيا، نيدەرلاندى، يسپانيا، سلوۆەنيا، پولشا، رەسەي جانە بەلارۋستەن جوعارى دەڭگەيلى 13 شەتەلدىك ترەنەر-كونسۋلتانت شاقىرعان.
ايتا كەتەيىك، قىسقى وليمپيادا ويىندارى يتاليادا 2026 جىلى 6–22 اقپان ارالىعىندا وتەدى. ءدۇبىرلى دوداعا 93 ەلدەن شامامەن 3 مىڭعا جۋىق سپورتشى قاتىسادى دەپ جوسپارلانۋدا.
