ەلىمىزدە سپورتشىلار مەن جاتتىقتىرۋشىلارعا ارنالعان اي سايىنعى تولەمدەردىڭ بىرىڭعاي جۇيەسى ەنگىزىلدى. بۇل تۋرالى تۋريزم جانە سپورت مينيسترلىگى ايتتى، دەپ حابارلايدى «ادىرنا» ءتىلشىسى.
«دەنە شىنىقتىرۋ جانە سپورت تۋرالى» زاڭ قابىلدانعاننان كەيىن، سپورت تۇرلەرى بويىنشا قازاقستان رەسپۋبليكاسى ۇلتتىق كوماندالارىنىڭ قۇرامىنا كىرەتىن سپورتشىلارعا، ولاردىڭ جاتتىقتىرۋشىلارىنا اي سايىنعى اقشا قاراجاتى تولەمدەرىنىڭ مولشەرىن بەكىتۋ تۋرالى بۇيرىق كۇشىنە ەندى. اي سايىنعى تولەم مولشەرى 5-تەن 250 ايلىق ەسەپتىك كورسەتكىشكە (اەك) دەيىنگى ارالىقتا بەلگىلەنگەن. جاڭا جۇيە ينفلياتسيانى ەسكەرە وتىرىپ، تولەم سوماسىن جىل سايىن قايتا قاراۋدى قاجەت ەتپەي، قارجىلاندىرۋ كولەمىن اۆتوماتتى تۇردە تۇزەتۋگە مۇمكىندىك بەرەدى. ايتا كەتۋ كەرەك، بۇعان دەيىن بۇل تولەمدەر ءار وڭىردە ءارتۇرلى بولعان»،—دەلىنگەن حابارلامادا.
جاڭا جۇيە بويىنشا تولەمدەر حالىقارالىق جانە رەسپۋبليكالىق جارىستاردا جوعارى ناتيجە كورسەتكەن سپورتشىلار مەن ولاردىڭ جاتتىقتىرۋشىلارىنا، سپورتتىق مانسابىن جالعاستىرۋ شارتىمەن، كەلەسى جارىسقا دەيىن جەرگىلىكتى اتقارۋشى ورگاندار ارقىلى جۇزەگە اسىرىلادى.
