26 جەلتوقساندا قازاقستان پرەزيدەنتى قاسىم-جومارت توقاەۆ تاريحي-مادەني مۇرا وبەكتىلەرىن قورعاۋ ماسەلەلەرى بويىنشا تۇزەتۋلەرگە قول قويدى. بۇل تۋرالى اقوردانىڭ ءباسپاسوز قىزمەتى رەسمي حابارلاما جاريالادى، دەپ حابارلايدى "ادىرنا".
"مەملەكەت باسشىسى "تاريحي-مادەني مۇرا وبەكتىلەرىن قورعاۋ جانە ءبىلىم بەرۋ-ساۋىقتىرۋ قىزمەتتەرى ماسەلەلەرى بويىنشا قازاقستان رەسپۋبليكاسىنىڭ كەيبىر زاڭنامالىق اكتىلەرىنە وزگەرىستەر مەن تولىقتىرۋلار ەنگىزۋ تۋرالى" زاڭعا قول قويدى".
زاڭنىڭ ماقساتى – تاريحي-مادەني مۇرا وبەكتىلەرىن قورعاۋ جانە ءبىلىم بەرۋ-ساۋىقتىرۋ قىزمەتى سالاسىنداعى زاڭنامانى جەتىلدىرۋ.
زاڭدا تومەندەگىلەر كوزدەلگەن:
- ارحەولوگيالىق زەرتتەۋلەر بارىسىندا انىقتالعان تاريحي-مادەني مۇرا وبەكتىلەرى تۋرالى مالىمەتتەردى جيناۋ ءۇشىن ارحەولوگيالىق جۇمىستارعا ارنالعان بىرىڭعاي اۆتوماتتاندىرىلعان اقپاراتتىق جۇيە قۇرۋ;
- تاريحي-مادەني مۇرا وبەكتىلەرىن قورعاۋ ماقساتىندا جەر ۋچاسكەلەرىن بەرۋ جانە جەر پايدالانۋ ءتارتىبىن جەتىلدىرۋ;
- ارحەولوگيالىق ولجالار مەن ارحەولوگيالىق ماتەريالداردى بەرۋ، ساقتاۋ جانە پايدالانۋ ءتارتىبىن رەتتەۋ;
- ارحەولوگيالىق ولجالار مەن ماتەريالداردى ورتالىقتاندىرىلعان تۇردە جيناۋ، وقشاۋلاۋ جانە ساقتاۋ ءۇشىن مەملەكەتتىك قور مەن جاپپاي ارحەولوگيالىق ولجالاردىڭ ۇلتتىق دەپوزيتاريىن قۇرۋ;
- ارحەولوگيالىق جۇمىستاردى ولاردىڭ ەرەكشەلىگى مەن قارجىلاندىرۋ تەتىكتەرىن ەسكەرە وتىرىپ، جوسپاردان تىس (الدىن الۋ) جانە جوسپارلى جۇمىستارعا ءبولۋ;
- تاريحي-مادەني مۇرا وبەكتىلەرىن قورعاۋ جانە پايدالانۋ سالاسىنداعى قولدانىستاعى ۇيىمداردىڭ قىزمەتىن جۇزەگە اسىرۋدىڭ بىرىڭعاي ءتارتىبىن ايقىنداۋ;
- ارحەولوگيالىق جۇمىستار جۇرگىزۋ كەزىندە تەحنيكالىق قۇرالداردى پايدالانۋ ءتارتىبىن رەتتەۋ;
- ارحەولوگيالىق جۇمىستار بارىسىندا انىقتالعان تاريحي-مادەني مۇرا وبەكتىلەرى ءۇشىن قورعاۋ ايماقتارىن بەلگىلەۋ.
ۇقساس جاڭالىقتار
