ريددەر قالاسىندا كولىك جۇرگىزۋشىسى بالانى قاعىپ، وقيعا ورنىنان قاشىپ كەتكەن، دەپ حابارلايدى «ادىرنا» ءتىلشىسى noks.kz-كە سىلتەمە جاساپ.
وقىس وقيعا 23 جەلتوقساندا كوپقاباتتى تۇرعىن ءۇيدىڭ اۋلاسىندا بولعان.
التى جاستاعى بالا پودەزدەن جۇگىرىپ شىققان ساتتە ونى ءوتىپ بارا جاتقان اۆتوكولىك قاعىپ كەتكەن. سوققىدان بالا بىرنەشە مەترگە ۇشىپ كەتكەنىمەن، وزدىگىنەن ورنىنان تۇرعان. جۇرگىزۋشى كولىكتەن شىعىپ، بالامەن سويلەسكەن. الايدا بالانىڭ جاعدايىن «قالىپتى» دەپ باعالاپ، ەشقانداي كومەك كورسەتپەستەن وقيعا ورنىنان كەتىپ قالعان.
جىلاپ تۇرعان بالانى جانە بولعان جايتتىڭ ءبارىن كۋاگەرلەر كورگەن. ولار دابىل قاعىپ، جەرگىلىكتى چاتتا جول اپاتى تۋرالى حابارلاعان. اۋلاعا ورناتىلعان بەينەباقىلاۋ كامەرالارى وقيعانى تولىق تىركەپ العان. اقپارات قالا ىشىندە تەز تاراپ، جول اپاتى ورنىن تاستاپ كەتكەن جۇرگىزۋشى انىقتالىپ، پوليتسيا بولىمىنە جەتكىزىلگەن.
«23 جەلتوقساندا ريددەر قالاسىندا Lada X-Ray اۆتوكولىگىنىڭ جۇرگىزۋشىسى تۇرعىن ۇيلەردىڭ ءبىرىنىڭ ماڭىندا كامەلەتكە تولماعان جاياۋ جۇرگىنشىنى قاعىپ كەتتى. جول-كولىك وقيعاسى سالدارىنان زارداپ شەككەن بالا مەديتسينالىق مەكەمەگە جەتكىزىلدى. پوليتسيا قىزمەتكەرلەرى جۇرگىزۋشىنى انىقتادى، كولىگى تاركىلەنىپ، ارنايى تۇراققا قويىلدى. اتالعان دەرەك بويىنشا ءتيىستى ساراپتامالار تاعايىندالىپ، ولاردىڭ ناتيجەسىنە قاراي پروتسەسسۋالدىق شەشىم قابىلدانادى»،- دەدى شىعىس قازاقستان وبلىسىنىڭ پوليتسيا دەپارتامەنتى.
بالا مەديتسينالىق مەكەمەگە جەتكىزىلگەن. قازىر ونىڭ جاعدايى تۇراقتى.
