تاعى دا Toyota Alphard كولىگىمەن بولعان اسا اۋىر جول-كولىك وقيعاسىنان بىردەن التى ادام قازا تاپتى، ولاردىڭ ەكەۋى پوليتسيا قىزمەتكەرى، تاعى ءتورت ادامنىڭ جاعدايى اۋىر ەكەنى ايتىلدى، دەپ حابارلايدى “ادىرنا” ۇلتتىق پورتالى.
«2024 جىلعى 17 تامىزدا ساعات 1.00 شاماسىندا «مەركى-شۋ-بۋرىلبايتال» رەسپۋبليكالىق تاس جولىنىڭ 40-شاقىرىمىندا اۋىر جول-كولىك وقيعاسى بولدى. Toyota Alphard كولىگىنىڭ جۇرگىزۋشىسى قارسى جولاققا شىعىپ كەتىپ، پوليتسيا پاترۋلدىك پوليتسياسىنىڭ Skoda Octavia كولىگىمەن سوقتىعىسقان. وقيعا سالدارىنان قىزمەتتىك كولىكتە بولعان جانە جول قاۋىپسىزدىگىن قامتاماسىز ەتىپ، تاس جولدى كۇزەتىپ جۇرگەن ەكى پاترۋلدىك پوليتسەي وقيعا ورنىندا قازا تاپتى. قايتىس بولعان پوليتسەيلەردىڭ ءبىرى 11 بالاسى بار اكە. Toyota Alphard كولىگىندە سەگىز جولاۋشى بولعان. ولاردىڭ تورتەۋى وقيعا ورنىندا كوز جۇمدى، جۇرگىزۋشى مەن قالعان ءۇش جولاۋشى ءارتۇرلى اۋىرلىقتاعى جاراقاتتارمەن ورتالىق اۋداندىق اۋرۋحاناعا جاتقىزىلدى»، - دەپ حابارلادى سەنبى كۇنى جامبىل وبلىسى ءىىد ءباسپاسوز قىزمەتى.
قر قىلمىستىق كودەكسىنىڭ 345-بابىنىڭ 4-بولىگى (كولiك قۇرالدارىن باسقاراتىن ادامداردىڭ جول ءجۇرىسى نەمەسە كولiك قۇرالدارىن پايدالانۋ ەرەجەلەرiن بۇزۋى) بويىنشا قىلمىستىق ءىس قوزعالدى. قازىرگى ۋاقىتتا قاجەتتى تەرگەۋ شارالارى جۇرگىزىلۋدە.
«وسى قايعىلى وقيعادا قازا تاپقانداردىڭ وتباسىلارى مەن جاقىندارىنا قايعىلارىنا ورتاقتاسىپ كوڭىل ايتامىز. پوليتسيا جان-جاقتى تەرگەۋ جۇرگىزىپ، وقيعانىڭ بارلىق ءمان-جايىن انىقتاۋ ءۇشىن بارلىق قاجەتتى شارالاردى قابىلدايدى»، - دەپ تولىقتىردى ءتارتىپ ساقشىلارى.
