ريددەردە مەملەكەتتىك مەكەمەلەر، كاسىپورىندار مەن الەۋمەتتىك قىزمەتتەردىڭ جۇمىس كەستەسى وزگەردى. بۇل تۋرالى ريددەر اكىمىنىڭ ورىنباسارى بولات اقۋجانوۆ ايتتى، دەپ حابارلايدى “ادىرنپ” ۇلتتىق پورتالى.
اقپاراتقا سايكەس، 14 ناۋرىزدان باستاپ شىعىس قازاقستان وبلىسىنىڭ ريددەر تۇرعىندارىنىڭ جۇمىس كۇنى ءبىر ساعاتقا ەرتەرەك – تاڭعى 08:00-دە باستالىپ، 17:30-عا دەيىن جالعاسادى. تۇسكى ءۇزىلىس ۋاقىتى 12:00-دەن 13:30-عا دەيىن بەلگىلەندى.
قالالىق اكىمدىك بۇل وزگەرىستىڭ باستى ماقساتى – ەڭبەك پروتسەسىن وڭتايلاندىرىپ، جۇمىس تيىمدىلىگىن ارتتىرۋ ەكەنىن اتاپ ءوتتى.
"بۇگىندە شىعىس قازاقستان وبلىسىنىڭ 11 اۋدانى جاڭا جۇمىس كەستەسىنە كوشتى، ءبىز دە بۇل باستامانى قۋانا قولدادىق. جۇمىس ۋاقىتىنىڭ وزگەرۋى – كۇن ءتارتىبىن ىڭعايلى ءارى ءونىمدى ەتۋگە جاسالعان قادام. ەندى تۇرعىنداردىڭ ەنەرگياسى ۇنەمدەلىپ، تاڭعى ۋاقىت ءتيىمدى پايدالانىلادى. سونداي-اق، كۇندىزگى جارىقتا كوبىرەك ءىس تىندىرۋعا مۇمكىندىك بار", – دەدى ريددەر اكىمىنىڭ ورىنباسارى بولات اقۋجانوۆ.
ونىڭ ايتۋىنشا، بۇل وزگەرىستەر جۇمىس ىستەيتىن ازاماتتار مەن ولاردىڭ وتباسىلارى ءۇشىن دە پايدالى بولماق.
ايتا كەتەيىك، جاڭا جۇمىس كەستەسى مەكتەپتەرگە، بالاباقشالارعا جانە مەديتسينالىق مەكەمەلەرگە اسەر ەتپەيدى، سەبەبى ولار بۇرىننان 08:00-دەن باستاپ جۇمىس ىستەپ كەلەدى.
ريددەر اكىمىنىڭ ورىنباسارى بولات اقۋجانوۆتىڭ سوزىنشە، جۇمىس ۋاقىتىن وزگەرتۋ تۋرالى شەشىم قابىلداماس بۇرىن قالا تۇرعىندارىمەن بىرنەشە كەزدەسۋ وتكىزىلىپ، ماسەلە جان-جاقتى تالقىلانعان.
"قالا تۇرعىندارى بۇل باستامانى قولدادى. جاڭا جۇمىس كەستەسى ۋاقىتتى ءتيىمدى پايدالانۋعا جانە جۇمىس پەن جەكە ءومىر اراسىنداعى تەڭگەرىمدى ساقتاۋعا كومەكتەسەدى دەپ ەسەپتەيمىن", – دەپ قورىتىندىلادى اكىم ورىنباسارى.
ايتا كەتەيىك، 29 اقپاننان 1 ناۋرىزعا قاراعان ءتۇنى قازاقستان بىرىڭعاي ۋاقىت بەلدەۋىنە ءوتتى. الايدا 7 ماۋسىمدا ۋاقىتتى قايتا وزگەرتۋگە قاتىستى پەتيتسيا باستالىپ، 50 مىڭنان استام قول جينالعانىمەن، ول قابىلدانبادى.
2025 جىلدىڭ قاڭتارىنان باستاپ شىعىس قازاقستان وبلىسىنىڭ بىرنەشە اۋدانى جاڭا جۇمىس ۋاقىتىنا كوشتى.
5 قاڭتاردان باستاپ كاتونقاراعاي اۋدانىنىڭ 17 اۋىلى، 24 اقپاندا – مارقاكول مەن ۇلكەن نارىن اۋداندارى، 5 ناۋرىزدا – زايسان، كۇرشىم، تارباعاتاي جانە سامار اۋداندارى، 12 ناۋرىزدا – التاي مەن ۇلان اۋداندارى جاڭا كەستەمەن جۇمىس ىستەي باستادى. بۇل اۋدانداردا جۇمىس كۇنى 08:00-دە باستالىپ، 17:30-دا اياقتالادى. تۇسكى ءۇزىلىس – 12:00-13:30 ارالىعىندا بەلگىلەنگەن.
