4 تامىز كۇنى شىعىس قازاقستاندا 14 جاستاعى قىز وزەنگە قۇلاپ، كوز جۇمدى، دەپ حابارلايدى “ادىرنا” ۇلتتىق پورتالى.
باق تاراتقان اقپاراتقا سايكەس، 20 ادامنان تۇراتىن توپ ءوز بەتىنشە جاياۋ سەرۋەندەگەن. جۇرگىنشىلەر ريددەردەن بەس شاقىرىم جەردە گروموتۋحا وزەنىنىڭ سارقىراماسىندا وزەن ارناسىنان وتپەك بولعان. سول ساتتە 14 جاستاعى قىز تاسقا تايىپ، سۋعا باتقان. قاتتى اعىس ونى الىپ كەتكەن.
“ساعات 14:45-تە №1 مامانداندىرىلعان ءورت ءسوندىرۋ بولىمىنە گروموتۋحا وزەنى ۋچاسكەسىندە "كومپانيا لك گەس" جشس سۋ قويماسىنان جوعارى اعىسقا قاراي ءبىر قىزدى سۋ الىپ كەتكەنى تۋرالى حابارلاندى. ساعات 15:30-دا وقيعا ورنىنا ۋاز قۇتقارۋ كولىگىندەگى 10 ادام جانە ريددەر قالالىق ءىىب-ءنىڭ 5 قىزمەتكەرىنەن تۇراتىن جسق-1 ءبولىمى جىبەرىلدى”، – دەپ حابارلادى ريددەر قالالىق توتەنشە جاعدايلار ءبولىمى.
گروموتۋحا وزەنىنىڭ جوعارعى اعىسى بويىنداعى شاتقال بويىنداعى "كومپانيا لك گەس" جشس سۋ قويماسىندا ىزدەۋ بىرنەشە ساعاتقا جالعاسىپ، 18:03-تە قىزدىڭ ءمايىتى سۋ الاتىن جەردەن بەس شاقىرىم جەردەن تابىلعان.
وقيعاعا بايلانىستى ريددەر قالالىق توتەنشە جاعدايلار ءبولىمىنىڭ قىزمەتكەرلەرى شىعىس قازاقستان تۇرعىندارىنا ەسكەرتۋ جاساپ، قاۋىپتى ايماققا ەرەسەكتەردىڭ بارۋىنا تىيىم سالىناتىنىن مالىمدەدى.
