استاناداعى اۋدانارالىق قىلمىستىق ىستەر سوتىندا 2025 جىلعى 22 جەلتوقساندا ءتىس ەمحاناسىندا قايتىس بولعان قىز بالانىڭ جاعدايىنا قاتىستى انەستەزيولوگ ايدا جۇماعاليەۆاعا قاتىستى قىلمىستىق ءىستىڭ ۇكىمى جاريالاندى، دەپ حابارلايدى "ادىرنا".
سوت توراعاسى قاجىمۇقان مەكەمتاس ايىپتالۋشىنى قازاقستان رەسپۋبليكاسى قىلمىستىق كودەكسىنىڭ 317-بابىنىڭ 3-بولىگىندە كوزدەلگەن قىلمىستىق قۇقىق بۇزۋشىلىقتى جاساعانى ءۇشىن كىنالى دەپ تانىعانىن جاريالادى.
"ايدا جۇماعاليەۆاعا 2 جىلعا باس بوستاندىعىنان ايىرۋ جازاسى تاعايىندالسىن، سونىمەن قاتار مەديتسينالىق كومەك نەمەسە قىزمەت كورسەتۋگە بايلانىستى لاۋازىمداردى اتقارۋ قۇقىعىنان 3 جىلعا ايىرۋ; 2025 جىلعى 23 ماۋسىمداعى "قازاقستان رەسپۋبليكاسىنىڭ تاۋەلسىزدىگىنىڭ 33 جىلدىعىنا بايلانىستى امنيستيا تۋرالى" زاڭىنىڭ 1-بابى بويىنشا نەگىزگى جازادان بوساتىلسىن. سوت ۇكىمى زاڭدى كۇشىنە ەنگەن سوڭ جۇماعاليەۆا ءوزى تۇراتىن جەرىندەگى پروباتسيا قىزمەتىنە تىركەلۋگە مىندەتتەلسىن", – دەدى سوت توراعاسى.
ايتا كەتسەك، استاناداعى Dental Park Ortho ستوماتولوگياسىندا ءۇش جاستاعى قىز قايتىس بولدى. قايعىلى جاعداي 2024 جىلدىڭ 30 قازانىندا بولعان. سودان كەيىن انەستەزيولوگ ايدا جۇماعاليەۆاعا قىلمىستىق ءىس قوزعالدى. سوتتالۋشى ءىس بارىسىندا وزىنە تاعىلعان ايىپتى مويىندامادى.
ءبۇلدىرشىننىڭ 9-11 ءتىسىن ەمدەۋ ءۇشىن «سەۆوران» ناركوزى سالىنعان. الايدا قىز «ۇيىقتاپ» جاتقان كەزدە جوسپار وزگەرىپ، ستوماتولوگ ونىڭ 18 ءتىسىن ەمدەگەن. قىز ويانباي قالعان.
18 جەلتوقساندا انەستەزيولوگ سوڭعى ءسوزىن ايتتى. ول كىناسىن مويىندامايتىنىن، ءوزىنىڭ ابىرويى مەن قادىر-قاسيەتى "تاپتالعانىن" اتاپ وتكەن. سول كۇنى سوت پروتسەسى قورىتىندى پىكىرلەرمەن اياقتالدى. مەملەكەتتىك ايىپتاۋشى ەركەبۇلان شالقاروۆ انەستەزيولوگتى كىنالى دەپ تانۋدى جانە 4 جىلعا باس بوستاندىعىنان ايىرۋ جازاسىن تاعايىنداۋدى، سونىمەن قاتار 3 جىل مەرزىمگە مەديتسينالىق قىزمەتپەن اينالىسۋ قۇقىعىنان ايىرۋدى سۇراعان. سونداي-اق ول كونستيتۋتسيا مەرەيتويىنا بايلانىستى امنيستيا اياسىندا جازادان بوساتۋدى ۇسىنعان.ۇقساس جاڭالىقتار
