Astanadaǧy audanaralyq qylmystyq ıster sotynda 2025 jylǧy 22 jeltoqsanda tıs emhanasynda qaitys bolǧan qyz balanyŋ jaǧdaiyna qatysty anesteziolog Aida Jūmaǧalievaǧa qatysty qylmystyq ıstıŋ ükımı jariialandy, dep habarlaidy "Adyrna".
Sot töraǧasy Qajymūqan Mekemtas aiyptaluşyny Qazaqstan Respublikasy Qylmystyq kodeksınıŋ 317-babynyŋ 3-bölıgınde közdelgen qylmystyq qūqyq būzuşylyqty jasaǧany üşın kınälı dep tanyǧanyn jariialady.
"Aida Jūmaǧalievaǧa 2 jylǧa bas bostandyǧynan aiyru jazasy taǧaiyndalsyn, sonymen qatar medisinalyq kömek nemese qyzmet körsetuge bailanysty lauazymdardy atqaru qūqyǧynan 3 jylǧa aiyru; 2025 jylǧy 23 mausymdaǧy "Qazaqstan Respublikasynyŋ täuelsızdıgınıŋ 33 jyldyǧyna bailanysty amnistiia turaly" Zaŋynyŋ 1-baby boiynşa negızgı jazadan bosatylsyn. Sot ükımı zaŋdy küşıne engen soŋ Jūmaǧalieva özı tūratyn jerındegı probasiia qyzmetıne tırkeluge mındettelsın", – dedı sot töraǧasy.
Aita ketsek, Astanadaǧy Dental Park Ortho stomatologiiasynda üş jastaǧy qyz qaitys boldy. Qaiǧyly jaǧdai 2024 jyldyŋ 30 qazanynda bolǧan. Sodan keiın anesteziolog Aida Jūmaǧalievaǧa qylmystyq ıs qozǧaldy. Sottaluşy ıs barysynda özıne taǧylǧan aiypty moiyndamady.
Büldırşınnıŋ 9-11 tısın emdeu üşın «Sevoran» narkozy salynǧan. Alaida qyz «ūiyqtap» jatqan kezde jospar özgerıp, stomatolog onyŋ 18 tısın emdegen. Qyz oianbai qalǧan.
18 jeltoqsanda anesteziolog soŋǧy sözın aitty. Ol kınäsın moiyndamaitynyn, özınıŋ abyroiy men qadır-qasietı "taptalǧanyn" atap ötken. Sol künı sot prosesı qorytyndy pıkırlermen aiaqtaldy. Memlekettık aiyptauşy Erkebūlan Şalqarov anesteziologty kınälı dep tanudy jäne 4 jylǧa bas bostandyǧynan aiyru jazasyn taǧaiyndaudy, sonymen qatar 3 jyl merzımge medisinalyq qyzmetpen ainalysu qūqyǧynan aiyrudy sūraǧan. Sondai-aq ol Konstitusiia mereitoiyna bailanysty amnistiia aiasynda jazadan bosatudy ūsynǧan.Ūqsas jaŋalyqtar
