قازاقستاندا سوڭعى جىلدارداعى ەڭ ماڭىزدى گەولوگيالىق جاڭالىقتاردىڭ ءبىرى تىركەلدى. قاراعاندى وبلىسىنىڭ اۋماعىندا سيرەك كەزدەسەتىن جەر مەتالدارىنا باي، اۋقىمدى الەۋەتكە يە جاڭا الاڭ انىقتالىپ، وعان «جاڭا قازاقستان» اتاۋى بەرىلدى. بۇل جاڭالىق ەلدىڭ مينەرالدىق-شيكىزات الەۋەتىن جاڭا دەڭگەيگە كوتەرۋگە مۇمكىندىك بەرەدى.
اتالعان جاڭالىق 2022–2024 جىلدارعا ارنالعان جەر قويناۋىن گەولوگيالىق زەردەلەۋ جونىندەگى مەملەكەتتىك باعدارلاما اياسىندا جۇزەگە اسىرىلدى. گەولوگيا كوميتەتىنىڭ مالىمەتىنشە، بۇل اۋماق الەمدىك سۇرانىسى قارقىندى ءوسىپ كەلە جاتقان ستراتەگيالىق مەتالداردى ءوندىرۋدىڭ جاڭا ورتالىعىنا اينالۋى مۇمكىن.
بارلاۋ جۇمىستارى قاراعاندى وبلىسىنداعى كۇيرەكتىكول ۋچاسكەسىندە جۇرگىزىلدى. زەرتتەۋدى مەردىگەر ۇيىم – «تسەنترگەولسەمكا» جشس جۇزەگە اسىردى. ناتيجەسىندە دوس-1, دوس-2, دوس-3 جانە ىرعىز دەپ اتالاتىن ءتورت پەرسپەكتيۆالى ايماق انىقتالىپ، ولاردىڭ اۋماعىندا سيرەك مەتالدار مەن سيرەك جەر ەلەمەنتتەرىنە باي توعىز رۋدالى دەنە تابىلدى. وسى ۋچاسكەلەردى قامتيتىن كەڭ بولجامدى اۋماق «جاڭا قازاقستان» دەپ اتالدى.
مامانداردىڭ ايتۋىنشا، جالپى كولەمى 134,6 شارشى شاقىرىمدى قۇرايتىن ءىرى گەوحيميالىق ورەولداردىڭ انىقتالۋى بۇل اۋماقتىڭ ونەركاسىپتىك تۇرعىدا يگەرىلۋ الەۋەتى جوعارى ەكەنىن كورسەتەدى. ساراپشىلاردىڭ پىكىرىنشە، بۇل قازاقستانداعى العاشقى تولىققاندى سيرەك جەر مەتالدارى كەن ورىندارىنىڭ بىرىنە اينالۋى مۇمكىن.
ورتالىق قازاقستان وڭىرارالىق گەولوگيا دەپارتامەنتى – «تسەنتركازنەدرا» باسشىسىنىڭ ورىنباسارى اسىلحان ءجۇنىسوۆ بۇل جاڭالىقتىڭ ماڭىزدىلىعىن ەرەكشە اتاپ ءوتتى. ونىڭ ايتۋىنشا، تاۋەلسىزدىك جىلدارىندا سيرەك كەزدەسەتىن جەر مەتالدارى بويىنشا مۇنداي ءىرى كورىنىس العاش رەت تىركەلىپ وتىر. جەكەلەگەن ەلەمەنتتەر بويىنشا بولجامدى رەسۋرستار ونداعان ميلليون تونناعا جەتۋى مۇمكىن، الايدا ازىرگە ولار رەسمي قور ساناتىنا ەنگىزىلگەن جوق.
بارلاۋ جۇمىستارى 300 مەترگە دەيىنگى تەرەڭدىكتە جۇرگىزىلدى. الدىن الا زەرتحانالىق تالداۋلار ەلەكترونيكادا، اككۋمۋلياتور وندىرىسىندە جانە «جاسىل» ەنەرگەتيكا سالاسىندا كەڭىنەن قولدانىلاتىن لانتان جانە باسقا دا سيرەك جەر ەلەمەنتتەرىنىڭ جوعارى مولشەرىن كورسەتتى.
قازاقستان رەسپۋبليكاسىنىڭ ونەركاسىپ جانە قۇرىلىس مينيسترلىگى بۇل ۋچاسكەگە گەولوگيالىق بارلاۋ جۇرگىزۋ ليتسەنزياسى «تاۋكەن-سامۇرىق» اق-عا بەرىلگەنىن حابارلادى. الداعى التى جىل ىشىندە كەشەندى گەولوگيالىق بارلاۋ جۇمىستارى جۇرگىزىلىپ، بۇرعىلاۋ، زەرتحانالىق زەرتتەۋلەر جانە قورلاردى ەسەپتەۋ جوسپارلانىپ وتىر.
قورلار راستالعان جاعدايدا عانا جوبانىڭ ەكونوميكالىق تيىمدىلىگى باعالانىپ، ينفراقۇرىلىم سالۋ جانە سيرەك جەر مەتالدارىن وڭدەيتىن وندىرىستەردى دامىتۋ ماسەلەلەرى قارالاتىن بولادى. سونىمەن قاتار مينيسترلىك ءىرى حالىقارالىق سەرىكتەستەردى تارتۋ مۇمكىندىگىن دە زەرتتەپ وتىر.
«جاڭا قازاقستان» كەن الاڭىنىڭ اشىلۋى ەلدە سيرەك جەر مەتالدارىنا نەگىزدەلگەن تولىققاندى ونەركاسىپتىك كلاستەر قالىپتاستىرۋعا جول اشۋى مۇمكىن. بۇل ءوز كەزەگىندە قازاقستاننىڭ جاھاندىق نارىقتاعى ستراتەگيالىق ورنىن نىعايتىپ، جوعارى تەحنولوگيالى جانە «جاسىل» ەكونوميكا سالالارىنداعى تاۋەلسىزدىگىن ارتتىرۋعا ىقپال ەتەدى.
