قاراعاندىدا قازا تاپقان كەنشىلەردىڭ قۇرمەتىنە مەموريالدىق ەسكەرتكىش ورناتىلدى، دەپ حابارلايدى "ادىرنا" ۇلتتىق پورتالى.
كوستەنكو اتىنداعى شاحتانىڭ اۋماعىندا 2023 جىلدىڭ 28 قازانىندا 46 كەنشى قازا تاپقان. قاراعاندى وبلىسى اكىمدىگىنىڭ مالىمەتىنشە، كەنشىلەردىڭ تۋىستارى مەن ارىپتەستەرى، بيلىك وكىلدەرى، Qarmet كومپانياسىنىڭ باسشىلىعى كوز جۇمعان شاحتەرلەردى ەسكە الىپ، گۇل شوقتارىن قويۋعا جينالدى.
"كوستەنكو شاحتاسىنداعى قايعىلى وقيعا قاراعاندىلىقتاردىڭ عانا ەمەس، بارلىق قازاقستاندىقتاردىڭ جۇرەگىندە تەرەڭ ءىز قالدىردى. بۇل ورنى تولماس قايعى. قازا تاپقانداردىڭ تۋىستارى مەن جاقىندارىنا شىن جۇرەكتەن كوڭىل ايتقىم كەلەدى. سول كۇندەرى مەملەكەت باسشىسى جاقىندارىنان ايىرىلعان وتباسىلاردى قولداۋ ءۇشىن قاراعاندىعا جەكە ءوزى كەلدى. ءبىز ءار وتباسىنا قاجەتتى قولداۋ مەن كومەك الۋى ءۇشىن قولدان كەلگەننىڭ ءبارىن جاسادىق. ەلباسى ءبىزدىڭ وبلىسقا سوڭعى ساپارى بارىسىندا كەنشىلەر ءۇشىن ەڭبەك قاۋىپسىزدىگى مەن لايىقتى جۇمىس جاعدايلارىن قامتاماسىز ەتۋگە باسا نازار اۋدارۋ كەرەكتىگىن تاعى دا قايتالادى", – دەدى قاراعاندى وبلىسىنىڭ اكىمى ەرماعانبەت بولەكپاەۆ.
مەموريالدىڭ اۆتورى قاراعاندىلىق ءمۇسىنشى جانە سۋرەتشى يگور باگراموۆ بولدى.
