ريم قالاسىنداعى پياتستسا دەل كۆيرينالە الاڭىندا 2026 جىلعى ميلان–كورتينا قىسقى وليمپيادا ويىندارىنىڭ الاۋىن جاعۋ سالتاناتتى ءراسىمى ءوتتى، دەپ حابارلايدى "ادىرنا" ۇلتتىق پورتالى.
گرەكيادان جەتكىزىلگەن وليمپيادا الاۋىن يتاليا پرەزيدەنتى سەردجو ماتتارەللا رەسمي تۇردە تۇتاتتى. سالتاناتتى شاراعا حالىقارالىق وليمپيادا كوميتەتىنىڭ پرەزيدەنتى كيرستي كوۆەنتري، ۇيىمداستىرۋ كوميتەتىنىڭ باسشىسى دجوۆانني مالاگو، سونداي-اق يتاليا ۇلتتىق وليمپيادالىق كوميتەتىنىڭ وكىلدەرى قاتىستى.
حوك پرەزيدەنتى كيرستي كوۆەنتري قۇتتىقتاۋ سوزىندە وليمپيادا الاۋىنىڭ ۇرپاقتار ساباقتاستىعىن جالعايتىن سيمۆول ەكەنىن اتاپ ءوتتى. ونىڭ ايتۋىنشا، بۇل الاۋ وليمپيادالىق قوزعالىستىڭ باستى قۇندىلىقتارىن – شابىتتاندىرۋدى، ادامداردى بىرىكتىرۋدى جانە ءاربىر سپورتشىنىڭ كەمسىتۋسىز جارىسقا قاتىسۋ قۇقىعىن قورعاۋدى بىلدىرەدى.
سونىمەن قاتار ول يتاليادا وتەتىن قىسقى وليمپيادا ويىندارى ءوز پرەزيدەنتتىك قىزمەتى كەزىندەگى العاشقى قىسقى وليمپيادا بولاتىنىن ايتىپ، جارىستاردىڭ بۇكىل الەم ءۇشىن جارقىن وقيعاعا اينالاتىنىنا سەنىم ءبىلدىردى.
يتاليا پرەزيدەنتى سەردجو ماتتارەللا وليمپيادا الاۋى بەيبىتشىلىك پەن بىرلىكتىڭ، ءوزارا قۇرمەتتىڭ بەلگىسى ەكەنىن ەرەكشە اتاپ ءوتتى. ونىڭ سوزىنشە، وليمپيادا جانە پاراليمپيادا ويىندارى ادامزاتپەن بارىنە ورتاق تىلدە سويلەسە الاتىن ەرەكشە كۇشكە يە. بۇل جارىستار تەڭدىك، سىيلاستىق جانە العا ۇمتىلۋ سەكىلدى قۇندىلىقتاردى دارىپتەيدى.
سالتاناتتى ءراسىم سوڭىندا دجوۆانني مالاگو وليمپيادا الاۋىن پرەزيدەنتكە تابىستاپ، سەردجو ماتتارەللا الاڭدا ورناتىلعان وليمپيادالىق شامدى جاقتى.
الاۋ ەستافەتاسىنىڭ العاشقى مەترلەرىن دجوۆانني مالاگو مەن يتاليالىق تەننيسشى جاسمين پاوليني بىرگە ءجۇرىپ ءوتتى.
ايتا كەتەيىك، يتاليا اۋماعىنداعى رەسمي ەستافەتا 6 جەلتوقساندا باستالىپ، ەلدىڭ مادەني جانە تاريحي ماڭىزدى وڭىرلەرىن، سونىڭ ىشىندە يۋنەسكو-نىڭ كوپتەگەن نىساندارىن قامتيتىن مارشرۋت بويىمەن وتەدى.
