Рим қаласындағы Пьяцца дель Квиринале алаңында 2026 жылғы Милан–Кортина қысқы Олимпиада ойындарының алауын жағу салтанатты рәсімі өтті, деп хабарлайды "Адырна" ұлттық порталы.
Грекиядан жеткізілген Олимпиада алауын Италия президенті Серджо Маттарелла ресми түрде тұтатты. Салтанатты шараға Халықаралық Олимпиада комитетінің президенті Кирсти Ковентри, ұйымдастыру комитетінің басшысы Джованни Малаго, сондай-ақ Италия Ұлттық Олимпиадалық комитетінің өкілдері қатысты.
ХОК президенті Кирсти Ковентри құттықтау сөзінде Олимпиада алауының ұрпақтар сабақтастығын жалғайтын символ екенін атап өтті. Оның айтуынша, бұл алау олимпиадалық қозғалыстың басты құндылықтарын – шабыттандыруды, адамдарды біріктіруді және әрбір спортшының кемсітусіз жарысқа қатысу құқығын қорғауды білдіреді.
Сонымен қатар ол Италияда өтетін қысқы Олимпиада ойындары өз президенттік қызметі кезіндегі алғашқы қысқы Олимпиада болатынын айтып, жарыстардың бүкіл әлем үшін жарқын оқиғаға айналатынына сенім білдірді.
Италия президенті Серджо Маттарелла Олимпиада алауы бейбітшілік пен бірліктің, өзара құрметтің белгісі екенін ерекше атап өтті. Оның сөзінше, Олимпиада және Паралимпиада ойындары адамзатпен бәріне ортақ тілде сөйлесе алатын ерекше күшке ие. Бұл жарыстар теңдік, сыйластық және алға ұмтылу секілді құндылықтарды дәріптейді.
Салтанатты рәсім соңында Джованни Малаго Олимпиада алауын президентке табыстап, Серджо Маттарелла алаңда орнатылған олимпиадалық шамды жақты.
Алау эстафетасының алғашқы метрлерін Джованни Малаго мен италиялық теннисші Жасмин Паолини бірге жүріп өтті.
Айта кетейік, Италия аумағындағы ресми эстафета 6 желтоқсанда басталып, елдің мәдени және тарихи маңызды өңірлерін, соның ішінде ЮНЕСКО-ның көптеген нысандарын қамтитын маршрут бойымен өтеді.
