اقمولا وبلىسىندا 2026 جىلعى 6–22 اقپان ارالىعىندا يتاليانىڭ ميلان جانە كورتينا-د’امپەتستسو قالالارىندا وتەتىن XXV قىسقى وليمپيادا ويىندارىنا ءوڭىر سپورتشىلارىنىڭ قاتىسۋىنا وراي بىرقاتار ءىس-شارالار ۇيىمداستىرىلدى.
وليمپياداشىلاردى قولداۋ ماقساتىندا 7 اقپاندا بۋراباي، زەرەندى، ساندىقتاۋ، ەرەيمەنتاۋ، بۇلاندى، قورعالجىن، جارقايىڭ، ءبىرجان سال اۋداندارىندا، سونداي-اق كوكشەتاۋ، ستەپنوگورسك جانە اقكول قالالارىندا جاپپاي شاڭعى جارىسى ءوتتى.
جارىسقا اقمولا وبلىسىنىڭ بالالار مەن جاسوسپىرىمدەر سپورت مەكتەپتەرىنىڭ تاربيەلەنۋشىلەرى، شاڭعى سپورتىن سۇيەتىن اۋەسقويلار مەن ارداگەرلەر قاتىستى. بارلىعى 900-دەن استام ادام ستارتقا شىقتى. شاڭعىشىلاردى وبلىس اكىمىنىڭ ورىنباسارى دوسۋلان ايتباەۆ قۇتتىقتادى.
قاتىسۋشىلاردىڭ ايتۋىنشا، بۇل شاڭعى جارىسى قازاقستان اتىنان ونەر كورسەتىپ جاتقان اقمولا وبلىسىنىڭ سپورتشىلارىنا دەگەن بىرلىك، قولداۋ جانە ماقتانىشتىڭ جارقىن بەلگىسىنە اينالدى.
ايتا كەتەيىك، تورتجىلدىقتىڭ باستى قىسقى جارىستارىندا اقمولا وبلىسىنىڭ نامىسىن التى سپورتشى قورعايدى. شورت-ترەك بويىنشا دەنيس نيكيشا، يانا حان جانە ولگا تيحونوۆا باق سىنايدى. ال شاڭعى جارىستارىندا ءوڭىر نامىسىن كسەنيا شالىگينا، نادەجدا ستەپاشكينا جانە اننا مەلنيك قورعايدى.
بۇگىن جەرگىلىكتى ۋاقىت بويىنشا ساعات 17.00-دە اقمولالىق سپورتشىلاردىڭ قاتىسۋىمەن العاشقى جارىس وتەدى. سكياتلون ديستسيپليناسىندا كسەنيا شالىگينا مەن نادەجدا ستەپاشكينا ستارتقا شىعادى.
