2026 جىلعى قىسقى وليمپيادا ويىندارى ميلان قالاسىندا ءوتتى. قازاقستان اتىنان تورەشىلىك جاساعان رەسەيلىك مامان نادەجدا پارەتسكايا ءوز وتانداسىنا نەگىزسىز جوعارى ۇپاي قويىپ، قازاقستاندىق سپورتشىلاردىڭ كورسەتكىشىن تومەندەتتى دەگەن ايىپ تاعىلدى، دەپ حابارلايدى "ادىرنا".
جەلى قولدانۋشىلارى مەن سپورت ساراپشىلارى پارەتسكايانىڭ ادىلدىگىنە كۇمان كەلتىرىپ وتىر. باستى نارازىلىق كەلەسى جايتتارعا بايلانىستى:
- ادەليا پەتروسياننىڭ جاعدايى: رەسەيلىك سپورتشى ەركىن باعدارلاما كەزىندە ءتورت اينالىمدىق تۋلۋپتى ورىنداۋ بارىسىندا مۇزعا قۇلاپ تۇسكەنىنە قاراماستان، پارەتسكايا وعان ەڭ جوعارى – 147,04 ۇپاي قويعان. باسقا تورەشىلەردىڭ باعاسى بۇدان الدەقايدا تومەن بولدى. وسى قولداۋدىڭ ارقاسىندا پەتروسيان جالپى ەسەپتە 6-ورىنعا تۇراقتادى.
- سوفيا سامودەلكيناعا قىسىم: قازاقستان نامىسىن قورعاپ جاتقان سامودەلكيناعا پارەتسكايا كەرىسىنشە تومەن ۇپاي بەرگەن. سالدارىنان جەرلەسىمىز تۋرنير كەستەسىندە 10-ورىنعا سىرعىدى.
تورەشىنىڭ «قىسپاعىنا» ەرلەر اراسىنداعى جارىستا ميحايل شايدوروۆ تا تۇسكەن. پارەتسكايا شايدوروۆتىڭ ۇپايىن ادەيى تومەندەتىپ، ونى 7-ورىنعا دەيىن ءتۇسىرىپ جىبەرگەن.
بۇل جاعداي قازاقستاندىق سپورتشىنى تاۋەكەلگە بارۋعا ءماجبۇر ەتتى:
- ميحايل ەركىن باعدارلامادا تەحنيكالىق جاعىنان وتە كۇردەلى بەس سەكىرۋ ەلەمەنتىن (تورت اينالىمدىق) ورىنداۋدى ۇيعاردى.
- قىسىمعا قاراماستان، شايدوروۆ مۇزدا ءمىنسىز ونەر كورسەتىپ، بارلىق قارسىلاستارىن شاڭ قاپتىردى.
- ناتيجەسىندە ميحايل شايدوروۆ وليمپيادا چەمپيونى اتانىپ، قازاقستان قورجىنىنا التىن مەدال سالدى.
قازاقستاندىق جانكۇيەرلەر الەۋمەتتىك جەلىلەردە نادەجدا پارەتسكايانىڭ بۇل ارەكەتىن «كاسىبي ەتيكاعا جات» دەپ باعالاپ، قازاقستاننىڭ مانەرلەپ سىرعاناۋ فەدەراتسياسىنان بۇل جاعدايعا بايلانىستى رەسمي تۇسىنىكتەمە تالاپ ەتىپ وتىر. كوپشىلىكتىڭ پىكىرىنشە، ەلىمىزدىڭ اتىنان باراتىن تورەشىلەر الدىمەن ءوز سپورتشىلارىمىزدىڭ مۇددەسىن قورعاۋى ءتيىس.
