الماتى قالاسىندا «ەلگە كومەك» قورىنىڭ باسشىسى، «قازاق روبين گۋدى» اتالىپ كەتكەن بلوگەر يلياس ساريەۆتىڭ ءىسى بويىنشا سوت ءجارىسسوزى جالعاسىپ جاتىر، دەپ حابارلايدى "ادىرنا" ۇلتتىق پورتالى.
ول 26 ەپيزود بويىنشا الاياقتىق جاسادى دەپ ايىپتالۋدا. 4 جەلتوقساندا ايىپتالۋشى مەن ونىڭ قورعاۋشىسى سوتتان قىلمىس قۇرامى بولماعاندىقتان تولىق اقتاۋدى سۇرادى.
يلياس ساريەۆ – الەۋمەتتىك جەلىدە 600 مىڭنان استام جازىلۋشىسى بار بلوگەر. ول اۋىر دەرتكە شالدىققان ازاماتتاردى ەمدەتۋگە قاراجات جيناۋ ماقساتىندا ءتۇرلى قايىرىمدىلىق باستامالارىن جاريالاپ كەلگەن.
ساريەۆ پەن 33 جاستاعى اقتوتى دۇيسەەۆا قر قىلمىستىق كودەكسىنىڭ 190-بابى 3-بولىگىنىڭ 4-تارماعى بويىنشا («الاياقتىقتى بىرنەشە رەت جاساۋ») ايىپتالۋدا. پروكۋراتۋرا تاراپىنان ءار ايىپتالۋشىعا 6 جىل باس بوستاندىعىنان ايىرۋ جازاسى سۇرالعان.
قىلمىستىق ءىس 26 ەپيزودتان تۇرادى.
سوتتاعى ءجارىسسوز بارىسىندا يلياس ساريەۆ ءوزىن كىناسىز دەپ تانىپ، قايىرىمدىلىق بەينەروليكتەرىنە قاتىستى ەپيزودتار بويىنشا جابىرلەنۋشىلەردەن كەشىرىم سۇرادى. ول ۆيدەولار جاريالانباۋدىڭ سەبەپتەرىن ءتۇسىندىرىپ، ادامداردى الداۋ نيەتى بولماعانىن ايتتى.
"مەن سوتتان مەنى تولىق اقتاۋدى سۇرايمىن. مەنىڭ الداۋ نيەتىم بولعان جوق. بارلىق تۇسىرىلگەن ۆيدەولاردى كورسەتتىم، ينتەرنەتكە شىقپاۋدىڭ سەبەبىن دە دالەلدەدىم. پاراقشانىڭ كورسەتكىشتەرى تومەندەپ كەتكەندىكتەن، بەينەماتەريالداردى ءساۋىر ايىندا سالۋ جوسپارلانعان ەدى. الايدا سول ۋاقىتتا قاماۋعا الىندىم", — دەدى ايىپتالۋشى.
ال تۋركومپانياعا قاتىستى 20 ەپيزود بويىنشا كىناسىن مويىنداماعان. ونىڭ سوزىنشە، ءوزى تەك جارنامامەن اينالىسقان، قاجىلىققا بارۋشىلاردان ەشقانداي اقشا الماعان. بۇعان دەيىن اقتوتى دۇيسەەۆا سوتتا ساريەۆتىڭ ونىڭ بانك شوتتارىنا تولىق قول جەتكىزە العانىن جانە 2024 جىلى قوماقتى قاراجاتتى شەشىپ العانىن مالىمدەگەن بولاتىن. الايدا ساريەۆ بۇل مالىمدەمەلەردىڭ سوتتا دالەلدەنبەگەنىن العا تارتتى.
