Almaty qalasynda «Elge kömek» qorynyŋ basşysy, «qazaq Robin Gudy» atalyp ketken bloger İlias Särievtıŋ ısı boiynşa sot jaryssözı jalǧasyp jatyr, dep habarlaidy "Adyrna" ūlttyq portaly.
Ol 26 epizod boiynşa alaiaqtyq jasady dep aiyptaluda. 4 jeltoqsanda aiyptaluşy men onyŋ qorǧauşysy sottan qylmys qūramy bolmaǧandyqtan tolyq aqtaudy sūrady.
İlias Säriev – äleumettık jelıde 600 myŋnan astam jazyluşysy bar bloger. Ol auyr dertke şaldyqqan azamattardy emdetuge qarajat jinau maqsatynda türlı qaiyrymdylyq bastamalaryn jariialap kelgen.
Säriev pen 33 jastaǧy Aqtoty Düiseeva QR Qylmystyq kodeksınıŋ 190-baby 3-bölıgınıŋ 4-tarmaǧy boiynşa («Alaiaqtyqty bırneşe ret jasau») aiyptaluda. Prokuratura tarapynan är aiyptaluşyǧa 6 jyl bas bostandyǧynan aiyru jazasy sūralǧan.
Qylmystyq ıs 26 epizodtan tūrady.
Sottaǧy jaryssöz barysynda İlias Säriev özın kınäsız dep tanyp, qaiyrymdylyq beinerolikterıne qatysty epizodtar boiynşa jäbırlenuşılerden keşırım sūrady. Ol videolar jariialanbaudyŋ sebepterın tüsındırıp, adamdardy aldau nietı bolmaǧanyn aitty.
"Men sottan menı tolyq aqtaudy sūraimyn. Menıŋ aldau nietım bolǧan joq. Barlyq tüsırılgen videolardy körsettım, internetke şyqpaudyŋ sebebın de däleldedım. Paraqşanyŋ körsetkışterı tömendep ketkendıkten, beinematerialdardy säuır aiynda salu josparlanǧan edı. Alaida sol uaqytta qamauǧa alyndym", — dedı aiyptaluşy.
Al turkompaniiaǧa qatysty 20 epizod boiynşa kınäsın moiyndamaǧan. Onyŋ sözınşe, özı tek jarnamamen ainalysqan, qajylyqqa baruşylardan eşqandai aqşa almaǧan. Būǧan deiın Aqtoty Düiseeva sotta Särievtıŋ onyŋ bank şottaryna tolyq qol jetkıze alǧanyn jäne 2024 jyly qomaqty qarajatty şeşıp alǧanyn mälımdegen bolatyn. Alaida Säriev būl mälımdemelerdıŋ sotta däleldenbegenın alǧa tartty.
