ۋكراينا پرەزيدەنتى ۆلاديمير زەلەنسكي رەسەيمەن قاقتىعىستى اياقتاۋعا قاتىستى قاراپايىم شەشىمدەر قابىلدانبايتىنىن مالىمدەدى. بۇل تۋرالى ول Telegram-ارناسىندا جازدى، دەپ حابارلايدى «ادىرنا» ءتىلشىسى.
«ماسەلە شەشىم قابىلداۋدىڭ قيىندىعىندا ەمەس. مەن ولاردى قابىلداۋعا نيەتتىمىن. ەڭ باستىسى، ءبارى ءادىل ءارى اشىق بولۋى ءتيىس. ۋكراينادان جاسىرىن ەشقانداي كەلىسىم جاسالماۋى كەرەك. ءبىزدىڭ ەلىمىز بەن بولاشاعىمىز تۋرالى ۋكرايناسىز ەشتەڭە شەشىلمەۋى ءتيىس»،-دەدى زەلەنسكي.
ۋكراينا باسشىسى شەكاراعا قاتىستى ماسەلەلەردى، رەسەيدىڭ مۇزداتىلعان اكتيۆتەرى مەن قاۋىپسىزدىك كەپىلدىكتەرىن «ەڭ سەزىمتال» ءارى «ەڭ كۇردەلى» تاقىرىپتار دەپ اتادى. ول كيەۆتىڭ اقش، ەۋروپا جانە باسقا دا سەرىكتەس ەلدەردەن «قۋاتتى قاۋىپسىزدىك كەپىلدىكتەرىن» كۇتەتىنىن اتاپ ءوتتى.
«مەنىڭ ويىمشا، وسى ءۇش ماسەلە — ەڭ ماڭىزدى جانە ەڭ سەزىمتال تاقىرىپتار. ءبىزدىڭ كوماندالار ءارى قاراي جۇمىسىن جالعاستىرا بەرەدى»، — دەپ قوستى زەلەنسكي.
ايتۋىنشا، كيەۆ اقش-تىڭ قانتوگىستى توقتاتۋ قاجەتتىگى جونىندەگى مالىمدەمەلەرىمەن تولىق كەلىسەدى.
ء«بىز سوعىستى اياقتاۋعا دايىنبىز. بىراق ونى رەسەي ءبىر جىلدان كەيىن قايتا باسىپ كىرمەيتىندەي ەتىپ اياقتاۋىمىز كەرەك. ولار ۋكرايناعا شابۋىل جاساۋ ماقساتىنا جەتە المادى. بىراق ولاردىڭ نيەتى وزگەردى دەپ سەنىمدى تۇردە ايتا المايمىن. ولار تەك كەيىنگە قالۋى مۇمكىن. سوندىقتان بىزگە قورعاۋ قاجەت»، – دەپ جازدى زەلەنسكي.
