ۋكرايندا بولىپ جاتقان سوعىسقا قارسى شىققان قالماقيانىڭ باس لاماسى "شەتەل اگەنتىنە" اينالىپ، قىزمەتىنەن ءتۇسىرىلدى. رەسەيدىڭ ادىلەت مينيسترلىگى 27 قاڭتار كۇنى "شەتەل اگەنتتەرىنىڭ" ءتىزىمىن جاڭارتتى. ءوزىنىڭ بەيبىتسۇيگىش كوزقاراسى ءۇشىن رەسەي بيلىگىنىڭ "قاھارىنا" ۇشىراعان قالماقيانىڭ باس لاماسى تەلو تۋلكۋ رينپوچە (ەردني-باسان ومبادىكوۆ) قىزمەتتەن كەتىپ، "شەتەل اگەنتى" رەتىندە تانىلدى، دەپ حابارلايدى "ادىرنا" ۇلتتىق پورتالى قالماقتاردىڭ ورتالىق حۋرۋل پورتالىنا سىلتەمە كورسەتە وتىرىپ.
"ازاتتىقتىڭ" كورسەتۋىنشە، تەلو تۋلكۋ رينپوچە 1990 جىلداردان بەرى قالماقيانىڭ باس لاماسى قىزمەتىن اتقارىپ كەلگەن. ول تيبەتتىك بۋدديزم جەتەكشىسى دالاي-لامانىڭ موڭعوليا مەن تمد ەلدەرىندەگى رەسمي وكىلى. بىلتىر قازاندا ول ۋكرايناداعى سوعىستى ايىپتاپ، ۋكراين جاعىنىڭ ارەكەتىن قولداعان. ءدىن جەتەكشىسى رەسەيدە سوعىستى جۇرت كوزىنشە سىناعان العاشقى ءدىني تۇلعا بولعان ەدى.
- سوڭعى ەكى كۇندە كوپتەگەن ادامدار مەنىڭ شەتەلدىك اگەنتتەر تىزىمىنە ەنگەنىمدى كورىپ الاڭداۋشىلىق پەن جاناشىرلىق ءبىلدىردى. ولاردىڭ مەنى جانە مەنىڭ اتقارعان ءىسىمدى جوعارى باعالاعانىنا شىن جۇرەكتەن ريزامىن.
قالماق حالقىنا جانە ءبۋدديزمنىڭ بارلىق ءىزباسارلارىنا وسى قيىن-قىستاۋ كەزەڭدەردە مويىمايتىن كۇش-قايرات، بۋددا ءىلىمى نەگىزدەلەتىن جاناشىرلىق، سۇيىسپەنشىلىك تىلەيمىن. زورلىق-زومبىلىققا قارسى تۇراتىن باتىلدىق، تاباندىلىق پەن ادالدىققا شاقىرامىن... "بۋددانىڭ شىدامدىلىعى مەن ءىلىمىن جۇرەگىڭىزدە ساقتاڭىز، شىندىق ءتۇبى جەڭەدى". مەن ارقاشان قالماق حالقىمەن بىرگەمىن، - دەدى باس لاما.
قالماق ايماعىنىڭ باس لاماسىمەن قاتار، "قاراپتان-قاراپ شەتەل اگەنتى" اتانعانداردىڭ قاتارىندا: Littlە Big توبىنىڭ ءانشىسى يليا پرۋسيكين، "سوعىسقا قارسى فەمينيستىك قارسىلاسۋ" توبىنىڭ بەلسەندىسى داريا سەرەنكو، Moscow Times ءتىلشىسى فيدەل اگۋماۆا، تاتار قۇقىق قورعاۋشىسى رافيس كاشاپوۆ جانە "تسيفرلىق قۇقىقتى دامىتۋ" قورى كوممەرتسيالىق ەمەس ۇيىمى جانە "كۇش كورسەتپەۋ فيلوسوفياسى" قوعامدىق بىرلەستىگى بار.
"ادىرنا" ۇلتتىق پورتالى
