قوردايداعى جاعداي: ساپارباەۆ سوڭعى جاڭالىقتاردى ايتتى

5741

جامبىل وبلىسىنىڭ جاڭا اكىمى بەردىبەك ساپارباەۆ قوردايداعى جاعدايدى ايتىپ بەردى، - دەپ حابارلايدى Tengrinews.kz تىلشىسى.

"بۇگىندە جالپى جامبىل وبلىسى قورداي اۋدانىنداعى جاعداي تۇراقتى. قۇقىق قورعاۋ ورگاندارى جەرگىلىكتى اتقارۋشى ورگاندارمەن جۇمىس ىستەپ جاتىر. بەس كۇندە 178 ادام مەديتسينالىق كومەككە جۇگىندى، ولاردىڭ 19-ى - پوليتسيا قىزمەتكەرلەرى. وكىنىشكە قاراي، 10 ادام قازا تاپتى. قازا تاپقانداردىڭ وتباسىنا كومەك كورسەتىلىپ جاتىر. كوميسسيا مۇشەلەرى مەملەكەت باسشىسىنىڭ اتىنان كوڭىل ايتىپ جاتىر", - دەدى جاڭا اكىم ۇكىمەت وتىرىسىندا.

ونىڭ ايتۋىنشا، 33 ادام اۋرۋحانادا جاتىر.

"قورداي اۋرۋحاناسىندا - 13 ادام، الماتىدا 20 ادام. قىرعىزستانداعى اۋرۋحانالاردا جاتقاندار الماتى مەن تارازعا اۋىستىرىلدى. بارلىعىنا مەديتسينالىق كومەك كورسەتىلىپ جاتىر. قوردايعا الماتىدان مىقتى، تانىمال دارىگەرلەر كەلدى", - دەدى وبلىس اكىمى.

سونداي-اق، ساپارباەۆ 10 اقپاننان باستاپ بارلىق مەكتەپ پەن بالاباقشانىڭ ادەتتەگىدەي جۇمىس ىستەپ جاتقانىن ايتىپ ءوتتى.

"جەرگىلىكتى كاسىپكەرلەر مەن تۇرعىندار ۇيلەر مەن ساۋدا ورىندارىن سالۋعا جۇمىلادى. بيزنەسمەندەرمەن جۇمىس ىستەپ جاتىرمىز. ولار كومەك كورسەتۋگە دايىن، بارلىق مۇمكىندىكتى پايدالانىمىز. جالپى جاعداي باقىلاۋدا. بارلىعى دۇرىستالادى دەپ ويلايمىن", - دەدى جاڭا اكىم.

ەسكە سالايىق، كەشە، 10 اقپاندا بەردىبەك ساپارباەۆتىڭ جامبىل وبلىسىنىڭ اكىمى قىزمەتىنە تاعايىندالعانى حابارلانعان ەدى.

 

پىكىرلەر