الماتى وبلىسىنىڭ اكىمى مارات سۇلتانعازيەۆ ورتالىق كوممۋنيكاتسيالار قىزمەتىندەگى بريفينگتە ءوڭىردىڭ ستراتەگيالىق دامۋىنىڭ نەگىزگى باعىتتارىن قورىتىندىلاپ، نازاردى قوناەۆ پەن الاتاۋ قالالارىنا اۋداردى.
اكىمنىڭ ايتۋىنشا، قوناەۆ قالاسىندا تۇرعىنداردىڭ ءومىر ءسۇرۋ ساپاسىن ارتتىرۋ ماقساتىندا «Smart Qonaev» تۇجىرىمداماسى ەنگىزىلگەن. قالادا قوعامدىق بەينەباقىلاۋ كامەرالارى، iQonaev ەلەكتروندىق جۇيەسى، جولاقى تولەۋ جۇيەسى جانە بىرىڭعاي تولەم قۇجاتى ىسكە اسىرىلعان.
ينفراقۇرىلىمدى جاڭارتۋ اياسىندا قوناەۆتا 39 شاقىرىم جول جوندەلىپ، 50 جاڭا ايالداما ورناتىلدى، 73 شاقىرىم ەلەكتر بەرۋ جەلىسى جانە 26 شاقىرىم سۋ قۇبىرى تارتىلدى، 11 ترانسفورماتور جاڭارتىلدى. سونىمەن قاتار قالاداعى 65 نىسان اباتتاندىرىلعان. №5 قالالىق جاعاجاي «ۇزدىك جاعاجاي» كونكۋرسىنا قاتىسقان 30 قاتىسۋشىنىڭ ىشىنەن بۋرابايدان كەيىن 2-ورىندى يەمدەندى.
ال الاتاۋ قالاسى 88 مىڭ گەكتار اۋماقتى قامتيتىن جانە 54,2 مىڭ تۇرعىنعا قىزمەت كورسەتەتىن دەربەس اكىمشىلىك-اۋماقتىق بىرلىككە اينالدى. ۇكىمەت قالانىڭ 2050 جىلعا دەيىنگى باس جوسپارىن بەكىتىپ، 12 نەگىزگى ءوسۋ نۇكتەسىن انىقتاعان. مەملەكەت باسشىسى قاسىم-جومارت توقاەۆتىڭ باستاماسىمەن الاتاۋ قالاسىنا ارنايى مارتەبە بەرىلۋ ءوڭىردى جاڭا، قارقىندى دامۋ كەزەڭىنە شىعاردى.
بۇل ماقساتتا الاتاۋ قالاسىن دامىتۋ جونىندەگى پرەمەر-ءمينيستردىڭ ورىنباسارى قانات بوزىمباەۆتىڭ توراعالىعىمەن جوبالىق كەڭسە قۇرىلىپ، ناتيجەلى جۇمىس جۇرگىزىلدى. ودان ءارى پرەزيدەنت جارلىعىنا سايكەس، قالانى دامىتۋ جونىندەگى كەڭەس جاساقتالدى، ونى پرەمەر-مينيستر باسقارادى. قازىر كونستيتۋتسيالىق زاڭ دايىندالىپ، جىل سوڭىنا دەيىن پارلامەنتكە ەنگىزۋ جوسپارلانىپ وتىر.
ينۆەستيتسيالىق باعىت بويىنشا الاتاۋ قالاسىندا جالپى قۇنى 1,5 ترلن تەڭگە بولاتىن 42 جوبا ىسكە اسىرىلدى. ولاردىڭ قاتارىندا PepsiCo, Mars, «مولوچنايا دولينا»، QazQon Hub تاعى باسقالارى بار.
سۇلتانعازيەۆتىڭ ايتۋىنشا، الماتى وبلىسىنىڭ الەۋمەتتىك، ەكونوميكالىق دامۋى ايقىن ناتيجەلەرگە جەتىپ وتىر. ءار سالا بويىنشا جۇيەلى جۇمىس جۇرگىزىلىپ، ءتۇيىندى ماسەلەلەر كەزەڭ-كەزەڭمەن شەشىلىپ جاتىر.
