شولپان-اتاداعى مۇحتار اۋەزوۆ مۇراجاي-ۇيىندە مۇرات مۇحتارۇلىنىڭ ءمۇسىنى ورناتىلدى، دەپ حابارلايدى "ادىرنا" ۇلتتىق پورتالى.
بۇل تۋرالى ۇلىقبەك ەسداۋلەت ءوز جەلىدەگى پاراقشاسىندا حابارلادى.
ەسكەرتكىش ءبيۋستتىڭ يدەياسى مەن جوباسىنىڭ اۆتورى، سونداي-اق ونى ورناتۋشى – قىرعىزستاننىڭ حالىق جازۋشىسى، توقتوعۇل اتىنداعى مەملەكەتتىك سىيلىقتىڭ لاۋرەاتى، تۇركسوي ۇيىمىنىڭ باس حاتشىسى سۇلتان اكىمۇلى راەۆ. ءمۇسىندى جاساعان – كورنەكتى سكۋلپتور تاميلا ماماتوۆا.
ۇلىقبەك ەسداۋلەت ءمۇسىن ورناتۋشىلارعا العىس ءبىلدىرىپ، «تۇلپاردىڭ تۇياعى، اسىلدىڭ سىنىعىنا ەسكەرتكىش! ۇلى ادامنىڭ ۇرپاعى دا ۇلى!» – دەپ اتاپ ءوتتى.
ايتا كەتەيىك، مۇرات مۇحتارۇلى اۋەزوۆ 1 قاڭتار 1943 جىلى مەركە كەنتىندە دۇنيەگە كەلگەن. ول مادەنيەتتانۋشى، فيلولوگيا عىلىمدارىنىڭ كانديداتى، قازاقستاننىڭ قىتايداعى توتەنشە جانە وكىلەتتى ەلشىسى قىزمەتتەرىن اتقارعان.
مۇرات اۋەزوۆ 14 ماۋسىم 2024 جىلى الماتىدا قايتىس بولدى.
