الماتى قالاسىنىڭ تۋريزم باسقارماسى گيدتەر مەن ەكسكۋرسوۆودتار ءۇشىن كاسىبي بىلىكتىلىكتى ارتتىرۋعا باعىتتالعان وقىتۋ كۋرستارىن وتكىزۋدە. باعدارلاما تۋريستىك قىزمەت ساپاسىن كوتەرۋ جانە قالانىڭ سەرۆيستىك دەڭگەيىن جاقسارتۋ ماقساتىندا جاسالعان.
وقىتۋ 17 قاراشادان 12 جەلتوقسانعا دەيىن وتۋدە جانە 200 قاتىسۋشىعا ارنالعان. كۋرستار قاتىسۋشىلارعا قازىرگى زامانعى تالاپتارعا ساي كاسىبي داعدىلارىن جەتىلدىرۋگە مۇمكىندىك بەرەدى.
باعدارلاما اياسىندا قاتىسۋشىلار ەكسكۋرسيالىق قىزمەت ستاندارتتارىن مەڭگەرىپ، تۋريستىك مارشرۋتتاردى ازىرلەۋ ادىستەمەسىن ۇيرەنەدى. سونداي-اق، الماتىنىڭ مادەني جانە تاريحي مۇراسىن زەرتتەپ، شەتەلدىك تۋريستەرمەن جانە مۇمكىندىگى شەكتەۋلى ادامدارمەن جۇمىس ىستەۋ داعدىلارىن دامىتادى.
كۋرس شەڭبەرىندە ماماندار ءدارىس وقىپ، تاجىريبەلەرىمەن بولىسۋدە. نەگىزگى سپيكەر — تسزەن چجيگو، Guilin تۋريزم ۋنيۆەرسيتەتىنىڭ (قحر) وقىتۋشىسى. حالىقارالىق تۋريزم، پروتوكولدىق قىزمەت كورسەتۋ جانە گيدتەردى دايارلاۋ سالاسىندا 20 جىلدان استام تاجىريبەسى بار مامان مادەنيەتارالىق كوممۋنيكاتسيا، حالىقارالىق ەتيكەت جانە ەكسكۋرسيالىق جۇمىستاردىڭ زاماناۋي ادىستەرى بويىنشا ساباق جۇرگىزەدى. وقىتۋ اياقتالعاننان كەيىن بارلىق قاتىسۋشىلارعا سەرتيفيكاتتار تابىستالادى.
بيىلعى جىلى Mastercard مالىمەتىنە سايكەس، تۋريستەردىڭ قاناعاتتانۋ دەڭگەيى 75,08%-ءتى قۇراپ، وتكەن جىلمەن سالىستىرعاندا 6 پۋنكتتىك ءوسىمدى كورسەتتى. بۇل مەگاپوليستەگى قىزمەت ساپاسىن ارتتىرۋ بويىنشا جۇرگىزىلىپ جاتقان جۇمىستاردىڭ وزەكتىلىگىن راستايدى. اتالمىش كۋرستار تۋريستەرگە ۇسىنىلاتىن قىزمەتتى ەداۋىر جاقسارتىپ، تۋريستىك اعىننىڭ وسۋىنە وڭ اسەر ەتەدى.
