گەرمانيا كانتسلەرى فريدريح مەرتس DW ارناسىنا بەرگەن سۇحباتىندا اقش ازىرلەگەن ۋكرايناداعى سوعىستى توقتاتۋ جونىندەگى “بەيبىت جوسپارىمەن” بەرلين تەك 21 قاراشادا عانا تانىسقانىن ايتتى. ونىڭ سوزىنشە، گەرمانيا بيلىگى 28 تارماقتان تۇراتىن قۇجاتتى وتكەن جۇمادا العان، دەپ حابارلايدى “ادىرنا”.
مەرتستىڭ ايتۋىنشا، ءدال سول كۇنى ول اقش پرەزيدەنتى دونالد ترامپەن تەلەفون ارقىلى سويلەسىپ، قۇجاتتى تالقىلاعان. كانتسلەر ۆاشينگتون ۇسىنعان كەي تارماقتار بويىنشا كەلىسۋگە بولاتىنىن، ال كەيبىر ماسەلەلەر گەرمانيا ءۇشىن قابىلدانبايتىنىن اتاپ وتكەن. سونىمەن بىرگە ول ترامپقا بەرليننىڭ ۋكراينا ەگەمەندىگىن تولىق قولدايتىنىن جەتكىزگەن.
بۇعان دەيىن Berliner Zeitung گازەتى گەرمانيا بيلىگى بۇل جوسپار تۋرالى قازان ايىنىڭ سوڭىندا-اق حاباردار بولعان دەپ جازعان ەدى. گازەت دەرەگى بىرنەشە رەسەيلىك مەديادا كەڭىنەن تاراتىلدى. الايدا مەرتس بۇل مالىمەتتى جوققا شىعاردى.
كانتسلەر ترامپ قويعان مەرزىم – 27 قاراشاعا دەيىن بارلىق تارماقتى كەلىسۋ مۇمكىن ەمەستىگىن ايتتى. وسىعان بايلانىستى قازىرگى ماقسات – كەم دەگەندە ارالىق ناتيجەلەرگە قول جەتكىزۋ.
مەرتس اسىرەسە اقش “بەيبىت جوسپارىنا” ەنگىزگەن داۋلى تارماقتى سىنعا الدى: قۇجاتقا سايكەس، ۋكراينادا پايدالانىلاتىن رەسەي اكتيۆتەرىنەن تۇسەتىن پايدىڭ جارتىسى اقش-قا بەرىلۋى ءتيىس. كانتسلەردىڭ ايتۋىنشا، ەو اۋماعىندا، اسىرەسە بريۋسسەلدە ورنالاسقان رەسەيلىك اكتيۆتەردى اقش-قا بەرۋ "مۇلدە مۇمكىن ەمەس" جانە ەۋروپانىڭ كەلىسىمىنسىز مۇنداي شەشىم جۇزەگە اسپايدى.
23 قاراشادا فريدريح مەرتس رەسەيدىڭ ۋكرايناعا قارسى سوعىسىن توقتاتۋ جونىندە گەرمانيانىڭ ءوز ۇسىنىسىن جاريالادى. بۇل باستاما – اقش ازىرلەگەن 28 تارماقتىق جوسپاردىڭ ىقشامدالعان نۇسقاسى. نەمىس ۇسىنىسى جەنەۆادا وتكەن ەو، اقش جانە ۋكراينا وكىلدەرىنىڭ كەلىسسوزدەرىندە تالقىلانعان.
