گەرمانيانىڭ ديۋسسەلدورف قالاسىندا ءوتىپ جاتقان ءداستۇرلى رەين جارمەڭكەسىندە (رەينكيرمەس) وتشاشۋ كەزىندە بولعان جارىلىستان 19 ادام زارداپ شەكتى، دەپ حابارلايدى "ادىرنا" ۇلتتىق پورتالى DW-گە سىلتەمە جاساپ.
جارىلىس 19 شىلدەگە قاراعان ءتۇنى بولعان. الدىن الا مالىمەت بويىنشا، وتشاشۋلاردىڭ ءبىرى بەلگىلەنگەن مەجەگە جەتپەي، تومەنگى دەڭگەيدە جارىلىپ كەتكەن. زارداپ شەككەندەردىڭ تورتەۋى – بالالار، ولار اۋىر جاراقات الدى. پوليتسيا بۇل وقيعانى كەزدەيسوق اپات دەپ باعالاپ وتىر.
جوسپار بويىنشا مەرەكەلىك شارا تاڭعا دەيىن جالعاسۋى ءتيىس بولعان، الايدا توتەنشە جاعدايعا بايلانىستى كەشكى 22:45 شاماسىندا ەرتە اياقتالدى. وقيعا ورنىنا شامامەن 80 قۇتقارۋشى مەن ءورت ءسوندىرۋشى جۇمىلدىرىلدى. جارالانعاندارعا جەدەل مەديتسينالىق كومەك كورسەتىلىپ، كەيبىرى اۋرۋحاناعا جەتكىزىلدى.
رەين جارمەڭكەسى ءبىر اپتا بۇرىن باستالعان. بۇل – گەرمانياداعى ەڭ ءىرى اشىق اسپان استىنداعى مەرەكەلەردىڭ ءبىرى سانالادى. بيىلعى باستى كورىنىستەردىڭ ءبىرى رەتىندە 1 000 درونمەن وتكىزىلگەن ەكى دۇركىن اۋە شوۋى اتالدى.
