23 قاراشادان باستاپ جول ەرەجەلەرىنە ەنگىزىلگەن وزگەرىستەر كۇشىنە ەندى، دەپ حابارلايدى «ادىرنا» ءتىلشىسى ىشكى ىستەر مينيسترلىگىنە سىلتەمە جاساپ.
اتاپ ايتساق، ەلدىمەكەندەردە جۇك كولىكتەرىنىڭ جىلدامدىعى ساعاتىنا 50 شاقىرىمعا دەيىن شەكتەلدى. بۇل شەكتەۋ جول بەلگىلەرىمەن ناقتى جىلدامدىق كورسەتىلگەن ۋچاسكەلەرگە قولدانىلمايدى (مىسالى، 80-90 كم/ساع).
مينيسترلىكتىڭ مالىمەتىنشە، جىلدامدىقتى تومەندەتۋ – جاياۋ جۇرگىنشىلەردىڭ قازا بولۋ قاۋپىن ازايتۋعا باعىتتالعان. بۇۇ دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنشە، جىلدامدىق 60–65 كم/ساع بولعاندا جاياۋ جۇرگىنشىنىڭ قازا بولۋ ىقتيمالدىعى 50 كم/ساع-پەن سالىستىرعاندا 4,5 ەسە جوعارى.
كورىنۋ ناشارلاعان كەزدە (بوران، تۇمان، قار، جاڭبىر) جول-كولىك وقيعالارىنىڭ الدىن الۋ ماقساتىندا كولوننا ءجۇرىسى كەزىندەگى پوليتسيا قىزمەتكەرلەرى مەن جول جۇرىسىنە قاتىسۋشىلاردىڭ قۇقىقتارى مەن مىندەتتەرى ناقتىلاندى. پاترۋلدىك كولىك قۇرالدارى ىلەسىپ جۇرەتىن كولوننالارعا قاتىستى تالاپتار دا جاڭارتىلدى.
مىسالى كولوننا ىشىندە مانەۆر جاساۋعا، باسىپ وزۋعا نەمەسە وزدىگىنەن توقتاۋعا تىيىم سالىنادى; كولىك تىزبەگىندەگى كولىك سانى 10-نان اسسا، ەكى پاترۋلدىك كولىكپەن ىلەسىپ الىپ ءجۇرۋ مىندەتتى; م2 جانە م3 ساناتىنداعى بارلىق اۆتوبۋسقا جولاۋشىلاردى وتىرعىزۋ جانە ءتۇسىرۋ ءۇشىن ايالدامالاردا توقتاۋعا رۇقسات ەتىلدى.
ءىرى كولەمدى جانە قاۋىپتى جۇكتەردى، ۆەلوسيپەدشىلەر توپتارىن، سونداي-اق بالالاردى تاسىمالدايتىن اۆتوبۋستاردى ىلەسىپ الىپ ءجۇرۋ كەزىندە جىلدام الىناتىن (ماگنيتتى) بەكىتپەسى بار قىزعىلت سارى نەمەسە سارى ءتۇستى جارقىلداۋىق ماياكتاردى رۇقساتسىز قولدانۋعا بولادى. بۇعان دەيىن مۇنداي ماياكتاردى پايدالانۋ ءۇشىن رۇقسات قۇجاتتارىن الۋ، قايتا جابدىقتاۋ راسىمىنەن ءوتۋ جانە تەحنيكالىق كۋالىككە بەلگى ەنگىزۋ تالاپ ەتىلەتىن. سونداي-اق جول پاراعىن ەلەكتروندى تۇردە قولدانۋعا رۇقسات بەرىلدى. ۆيزۋالدى قابىلداۋدى جاقسارتۋ ماقساتىندا بارلىق سۋرەتتەر، جول بەلگىلەرى مەن جول تاڭبالارى تسيفرلاندىرىلدى.
