23 qaraşadan bastap jol erejelerıne engızılgen özgerıster küşıne endı, dep habarlaidy «Adyrna» tılşısı Işkı ıster ministrlıgıne sılteme jasap.
Atap aitsaq, eldımekenderde jük kölıkterınıŋ jyldamdyǧy saǧatyna 50 şaqyrymǧa deiın şekteldı. Būl şekteu jol belgılerımen naqty jyldamdyq körsetılgen uchaskelerge qoldanylmaidy (mysaly, 80-90 km/saǧ).
Ministrlıktıŋ mälımetınşe, jyldamdyqty tömendetu – jaiau jürgınşılerdıŋ qaza bolu qaupın azaituǧa baǧyttalǧan. BŪŪ Düniejüzılık densaulyq saqtau ūiymynyŋ mälımetınşe, jyldamdyq 60–65 km/saǧ bolǧanda jaiau jürgınşınıŋ qaza bolu yqtimaldyǧy 50 km/saǧ-pen salystyrǧanda 4,5 ese joǧary.
Körınu naşarlaǧan kezde (boran, tūman, qar, jaŋbyr) jol-kölık oqiǧalarynyŋ aldyn alu maqsatynda kolonna jürısı kezındegı polisiia qyzmetkerlerı men jol jürısıne qatysuşylardyŋ qūqyqtary men mındetterı naqtylandy. Patruldık kölık qūraldary ılesıp jüretın kolonnalarǧa qatysty talaptar da jaŋartyldy.
Mysaly kolonna ışınde manevr jasauǧa, basyp ozuǧa nemese özdıgınen toqtauǧa tyiym salynady; kölık tızbegındegı kölık sany 10-nan assa, ekı patruldık kölıkpen ılesıp alyp jüru mındettı; M2 jäne M3 sanatyndaǧy barlyq avtobusqa jolauşylardy otyrǧyzu jäne tüsıru üşın aialdamalarda toqtauǧa rūqsat etıldı.
Irı kölemdı jäne qauıptı jükterdı, velosipedşıler toptaryn, sondai-aq balalardy tasymaldaityn avtobustardy ılesıp alyp jüru kezınde jyldam alynatyn (magnittı) bekıtpesı bar qyzǧylt sary nemese sary tüstı jarqyldauyq maiaktardy rūqsatsyz qoldanuǧa bolady. Būǧan deiın mūndai maiaktardy paidalanu üşın rūqsat qūjattaryn alu, qaita jabdyqtau räsımınen ötu jäne tehnikalyq kuälıkke belgı engızu talap etıletın. Sondai-aq jol paraǧyn elektrondy türde qoldanuǧa rūqsat berıldı. Vizualdy qabyldaudy jaqsartu maqsatynda barlyq suretter, jol belgılerı men jol taŋbalary sifrlandyryldy.
