Nazarbayev University زەرتتەۋشىلەر توبى جۇرەك-قان تامىرلارى اۋرۋلارىن دياگنوستيكالاۋدى جاڭا دەڭگەيگە شىعاراتىن بىرەگەي زەرتتەۋ جۇرگىزىپ، امەريكالىق جۇرەك قاۋىمداستىعىنىڭ نازارىن اۋداردى.
الەمدە العاش رەت عالىمدار جۇرەك جۇمىسىنىڭ جاڭا بيوماركەرى — گەموديناميكالىق كۇشتەردى — ەكى ۆيزتساليزاتسيالاۋ ادىسىمەن: ۋلترادىبىستىق ەحوكارديوگرافيا جانە ماگنيتتىك-رەزونانستىق توموگرافيا (مرت) ارقىلى ءبىر ۋاقىتتا سالىستىردى.
زەرتتەۋ ناتيجەلەرى Nature: Scientific Reports جۋرنالىندا جاريالانىپ، اقش-تىڭ جاڭا ورلەان قالاسىندا وتكەن American Heart Association 2025 كونفەرەنتسياسىندا تانىستىرىلدى. زەرتتەۋگە ءبىر عانا توپتان قۇرالعان دەنى ساۋ ەرىكتىلەر قاتىستى، بۇل ەكى ءادىستىڭ كورسەتكىشتەرىن ءدال سالىستىرۋعا مۇمكىندىك بەردى. عالىمدار ۋلترادىبىستىق زەرتتەۋ مرت-مەن سالىستىرعاندا جۇيەلى تۇردە تومەن كورسەتكىش بەرەتىنىن انىقتادى. بۇل ەكى ءادىستىڭ مالىمەتتەرىن ءبىر-ءبىرىن الماستىراتىن كورسەتكىش رەتىندە قولدانۋعا بولمايتىنىن كورسەتەدى — كلينيكالىق ينتەرپرەتاتسيادا بۇل ايىرماشىلىقتار مىندەتتى تۇردە ەسكەرىلۋى ءتيىس.
گەموديناميكالىق كۇشتەر جۇرەك قىزمەتىنىڭ باستاپقى بۇزىلىستارىن انىقتاۋدا ماڭىزدى كورسەتكىش بولۋى مۇمكىن، سەبەبى ولار سيمپتومدار پايدا بولماي تۇرىپ-اق، اقاۋدى انىقتاۋعا مۇمكىندىك بەرەدى. قازاقستاندىق زەرتتەۋشىلەردىڭ ارقاسىندا العاش رەت دەنى ساۋ ادامدارعا ارنالعان وسى كورسەتكىشتەردىڭ ەتالوندىق ماندەرى انىقتالدى — ەندى بۇل كورسەتكىشتەردى الەم ماماندارى قولدانا الادى.
بۇل جۇمىس جۇرەك-قان تامىرلارى جۇيەسىن ۆيزۋاليزاتسيالاۋ سالاسىنداعى بولاشاق زەرتتەۋلەر ءۇشىن جاڭا باعىت قالىپتاستىرادى. مۇنداي زەرتتەۋ الەمدە العاش رەت جۇرگىزىلىپ وتىر جانە قازاقستاندا الەمدىك عىلىمي ستاندارتتارعا ساي زەرتتەۋلەر جاسالىپ جاتقانىن دالەلدەيدى.
«امەريكاندىق جۇرەك اسسوتسياتسياسىنىڭ مويىنداۋى Nazarbayev University-دە جۇرەك-قان تامىرلارى مەديتسيناسىندا دامىپ كەلە جاتقان زەرتتەۋلەردىڭ جوعارى دەڭگەيىن جانە ءبىزدىڭ الەمدىك عىلىمعا قوسقان ۇلەسىمىزدى كورسەتەدى»، — دەيدى NU مەديتسينا مەكتەبىنىڭ زەرتتەۋشىسى ايجان جانقورازوۆا.
