ماڭعىستاۋ وبلىسىندا فاستفۋدتان ۋلانعانداردىڭ سانى 36 ادامعا جەتىپ، ولاردىڭ 28-ءى اۋرۋحاناعا جاتقىزىلدى, دەپ حابارلايدى “ادىرنا” ۇلتتىق پورتالى.
ماڭعىستاۋ وبلىستىق دەنساۋلىق ساقتاۋ باسقارماسىنىڭ مالىمەتىنشە، 8 ادامعا مەديتسينالىق كومەك كورسەتىلگەننەن كەيىن امبۋلاتوريالىق ەم تاعايىندالعان.
دارىگەرلەردىڭ ايتۋىنشا، اۋرۋحاناعا جاتقىزىلعان ناۋقاستاردىڭ جاعدايى ورتاشا اۋىر دەپ باعالانىپ وتىر. ۋلانعاندار اۋدان ورتالىعىنداعى «الي-مان» اتتى ءدامحانادا تاماقتانعان. 22 اقپاننان باستاپ اتالعان قوعامدىق تاماقتانۋ ورنىنىڭ قىزمەتى ۋاقىتشا توقتاتىلدى.
«ناۋقاستارعا وبلىستىڭ باس ينفەكتسيونيست-دارىگەرىمەن تەلەمەديتسينا ارقىلى كونسيليۋم ۇيىمداستىرىلىپ، ءتيىستى ەم-دوم تاعايىندالدى. بەينەۋ اۋداندىق كوپسالالى اۋرۋحاناسى ءدارى-دارمەكتەردىڭ جەتكىلىكتى قورىمەن قامتاماسىز ەتىلىپ، قوسىمشا 20 ادامعا ورىن دايىندالادى. امبۋلاتوريالىق ەم الاتىن ناۋقاستارعا قاجەتتى باكتەرياعا قارسى جانە سيمپتوماتيكالىق ەم تاعايىندالدى. قازىر وسىعان بايلانىستى ەپيدەميالىق شارالار جالعاسىپ جاتىر»، - دەپ جازىلعان ماڭعىستاۋ وبلىستىق دەنساۋلىق ساقتاۋ باسقارماسىنى ءباسپاسوز قىزمەتى تاراتقان اقپاراتتا.
سونىمەن بىرگە، جاپپاي تاماقتان ۋلانۋ دەرەگى بويىنشا ماڭعىستاۋ وبلىسىنىڭ سانيتاريالىق-ەپيدەميولوگيالىق باقىلاۋ دەپارتامەنتى تەرگەۋ جۇرگىزىپ جاتقانىن مالىمدەدى.
