19 قاراشادا قىرعىزستان پرەزيدەنتى سادىر جاپاروۆ قىتاي سىرتقى ىستەر ءمينيسترى ۆان ءيدى قابىلدادى، دەپ حابارلايدى «ادىرنا» ءتىلشىسى.
جاپاروۆ قىرعىز-قىتاي قاتىناستارىنىڭ بۇگىندە جوعارى دەڭگەيدە تۇرعانىن اتاپ ءوتتى. ول تەمىرجول جانە اۆتوجول قۇرىلىسى، جاڭا اۋە باعىتتارىنىڭ اشىلۋى، سونداي-اق كوپتەگەن سالاداعى بىرلەسكەن جوبالاردىڭ جۇزەگە اسىرىلۋىن مىسالعا كەلتىردى.
مەملەكەت باسشىسى سونداي-اق شىۇ اياسىنداعى جانە «ورتالىق ازيا — قىتاي» فورماتىنداعى كوپجاقتى ىنتىماقتاستىقتىڭ قارقىندى نىعايىپ كەلە جاتقانىن ايتتى.
ءوز كەزەگىندە قحر سىرتقى ىستەر ءمينيسترى ەكى ەل باسشىسى قول جەتكىزگەن كەلىسىمدەردى جۇزەگە اسىرۋ ءۇشىن بارلىق كۇش-جىگەرىن جۇمساۋعا دايىن ەكەنىن ءبىلدىردى.
مينيستر وسىدان ءۇش جىل بۇرىن قىرعىزستاندا بولعانىن، سول ۋاقىت ىشىندە ەل ايتارلىقتاي تابىستارعا قول جەتكىزگەنىن اتاپ ءوتتى.
ۆان ي سونداي-اق قىرعىزستاندا جۇمىس ىستەيتىن قىتايلىق كومپانيالاردىڭ وكىلدەرىنە ەلدىڭ زاڭناماسىن قاتاڭ ساقتاۋ جانە جەرگىلىكتى داستۇرلەردى قۇرمەتتەۋ قاجەتتىگى تۋرالى تالاپ جەتكىزىلىپ جاتقانىن ايتتى.
ەسكە سالايىق، 15 قاراشادا قىرعىزستاندا قىتاي جانە قىرعىز جۇمىسشىلارى اراسىندا توبەلەس بولعان ەدى. پوليتسيا 16 ادامدى ۇستاپ، تاعى 44 ادامدى تەرگەۋگە شاقىرعان، اراسىندا قىتايلىق جۇمىسشىلار دا بار. پرەزيدەنتتىڭ اقپاراتتىق ساياسات قىزمەتىنىڭ جەتەكشىسى دايىربەك ورۋنبەكوۆ شەتەل ازاماتتارىنىڭ ەلدە بولۋىنا قاتىستى تالاپتار ۆيزا رەجيمىمەنقاتاڭ رەتتەلەتىنىن، ۆيزا مەرزىمى اياقتالعان سوڭ ولاردىڭ ەلدەن كەتۋى مىندەتتى ەكەنىن باسا ايتقان بولاتىن.
