تۇركىستان وبلىسى جەتىساي اۋدانى العاباس اۋىلىندا ورىن العان قاسىرەتتى ورتتەن قازا تاپقان 12 ادامنىڭ جانازاسى ءوتتى، دەپ حابارلايدى "ادىرنا" ۇلتتىق پورتالى.
جانازا بارىسىندا بىرنەشە جۇك كولىگىنىڭ بىرىنەن سوڭ ءبىرى شىعىپ بارا جاتقانى تۇسىرىلگەن ۆيدەو الەۋمەتتىك جەلىدە تارادى.
ال مارقۇمداردى جەرلەۋ راسىمىنە اۋىل تۇرعىندارى كوپتەپ جينالعان.
العاشقى بولجام بويىنشا، ورتكە ۇيدەگى ەلەكتر سىمدارىنىڭ قىسقا تۇيىقتالۋى سەبەپ بولۋى مۇمكىن. قايعىلى وقيعاعا بايلانىستى پىكىر بىلدىرگەن كورشى قايىربەرگەن بولجىمبەتوۆ جارىلىس دىبىسىنىڭ ەستىلمەگەنىن ايتتى.
“ماعان ەلەكتر سىمدارى تۇيىقتالىپ، توقتان شىققان بولۋى مۇمكىن دەدى. 12 ادامنىڭ قازا تاپقانىن، تاعى ۇشەۋىنىڭ اۋرۋحانادا جاتقانىن ەستىدىم”، – دەيدى ول.
كورشىلەردىڭ ايتۋىنشا، ەكى قاباتتى ءۇي وتقا ورانىپ، تولىقتاي جانىپ كەتكەن. وتباسى بۇل ۇيگە ءۇش جىل بۇرىن كوشىپ كەلگەن. اكەلەرى قايتىس بولعان سوڭ، ۇلكەن ۇل – 1994 جىلى تۋعان داۋرەن ءوز جانۇياسىمەن وسى ۇيدە تۇرعان. ونىڭ ءتورت بالاسى بولعان. وقيعا تۇنىندە وتباسىنىڭ ءبىر بولىگى تويدان كەيىن ۇيلەرىنە كەتكەن، ال ەكىنشى باۋىردىڭ وتباسى سول ءتۇنى وسى ۇيدە تۇنەپ قالعان.
تەرگەۋ بارىسىندا ەرەكشە نازار اۋدارىلىپ وتىرعان جايت – ءۇيدىڭ بارلىق تەرەزەلەرىنىڭ تەمىر تورمەن جابىلۋى. بۇل فاكتور ادامداردىڭ ءورت كەزىندە سىرتقا شىعۋىنا كەدەرگى بولعان-بولماعانىن ماماندار انىقتايتىن بولادى. كورشىلەردىڭ سوزىنە سۇيەنسەك، شامامەن تاڭعى 5-تەردە كومەك سۇراعان ايقاي ەستىلگەن.
“ۇيگە بارعانىمىزدا لاپ ەتكەن وتتى كوردىك. ايەل ادام ايقايلاعان سياقتى، بىراق تۇتىننەن ۋلانىپ قالعان بولۋى مۇمكىن…” – دەيدى كوزكورگەندەر.
قايعىلى جاعداي ورنىنا ۇكىمەتتىك كوميسسيانى باستاپ بارعان ۆيتسە-پرەمەر قانات بوزىمباەۆ ءتيىستى ورگاندارعا ءورتتىڭ ناقتى سەبەبىن انىقتاۋدى تاپسىردى.
اۋرۋحاناعا تۇسكەن ءۇش ادامنىڭ جاعدايى اۋىر. 1986 جىلى تۋعان ەر ادامنىڭ دەنەسىنىڭ 12 پايىزى كۇيگەن، ءوجج اپپاراتىنا قوسىلعان. 1991 جانە 2018 جىلى تۋعان ەكى زارداپ شەگۋشى دە جانساقتاۋ بولىمىندە جاتىر. ولارعا كومەك كورسەتۋ ءۇشىن شىمكەنتتەن سانيتارلىق اۆياتسيا جىبەرىلدى.
ۆيتسە-پرەمەر اكىمدىك پەن ەڭبەك مينيسترلىگىنە قازا تاپقانداردىڭ وتباسىلارىنا تولىق كولەمدە ماتەريالدىق كومەك كورسەتۋدى تاپسىردى. سونداي-اق دەنساۋلىق ساقتاۋ مينيسترلىگىنە زارداپ شەككەندەردىڭ جاعدايىن باقىلاۋدا ۇستاپ، قاجەت بولعان جاعدايدا استاناعا سانيتارلىق اۆياتسيامەن جەتكىزۋدى ۇيىمداستىرۋ جۇكتەلدى. ىشكى ىستەر مينيسترلىگىنە تەرگەۋدى ەرەكشە باقىلاۋعا الۋ تاپسىرىلدى.
توتەنشە جاعدايلار مينيسترلىگى ءوڭىر اكىمدىكتەرىمەن بىرگە تۇرعىن ۇيلەردە، اسىرەسە الەۋمەتتىك وسال توپتار تۇراتىن باسپانالاردا، جاتاقحانالار مەن حوستەلدەردە ءورت قاۋىپسىزدىگى بويىنشا رەيدتەر جۇرگىزۋدى باستايدى. پەشتەر مەن ەلەكتر جۇيەلەرىندەگى اقاۋلار انىقتالسا، بىردەن جويىلۋعا ءتيىس.
قايعىلى جاعداي بۇكىل ەلدى توپەگەن قارالى حابارعا اينالدى.
