تۇركىستان قالاسىنىڭ تۇرعىنى ءوزىنىڭ بۇيرەگىن ساتپاق بولعان. بۇل تۋرالى وبلىستىق سوت مالىمدەدى، دەپ حابارلايدى "ادىرنا".
بىلتىر اقپاندا ەر ادام ءوزىنىڭ بۇيرەگىن ساتاتىنىن ايتىپ، تەلەگرام ارناسىنا جارناما جاساعان.
"سوتتالۋشىدان بۇيرەگىن ساتىپ الماق بولىپ، ىشكى ىستەر ورگاندارىنىڭ قىزمەتكەرى جاسىرىن كەلىسەدى. ەر ادام 13 ملن تەڭگەگە ساتۋعا كەلىسىپ، 5 ملن تەڭگە اقشا قاراجاتىن قولما-قول الۋ بارىسىندا ۇستالعان", - دەيدى سوتتا.
ءىس تۇركىستان قالاسىنىڭ اۋدانارالىق سوتىندا قارالدى. تاعىلعان ايىپ - "ترانسپلانتاتسيالاۋ نە وزگەدەي پايدالانۋ ءۇشىن ءتىرى ادامانىڭ اعزالارىنا قاتىستى زاڭسىز مامىلەلەر جاساۋعا وقتالۋ".
سوتتالۋشى ءوز كىناسىن تولىق مويىنداپ، بۇل ارەكەتكە اۋىر ماتەريالدىق جاعدايى مەن اقشا قاراجاتىنا مۇقتاجدىعى سەبەپ بولعانىن ايتقان.
"سوت جاسالعان ارەكەت اۋىرلىعى ورتاشا قىلمىس ساناتىنا جاتاتىنىن جانە زيان كەلتىرىلمەگەنىن ەسكەردى. سوتتالۋشى راقىمشىلىق جاساۋ تۋرالى زاڭعا بايلانىستى قىلمىستىق جاۋاپتىلىقتان بوساتىلدى", - دەيدى تۇركىستان وبلىستىق سوتىندا.
