Türkıstan oblysy Jetısai audany Alǧabas auylynda oryn alǧan qasırettı örtten qaza tapqan 12 adamnyŋ janazasy öttı, dep habarlaidy "Adyrna" ūlttyq portaly.
Janaza barysynda bırneşe jük kölıgınıŋ bırınen soŋ bırı şyǧyp bara jatqany tüsırılgen video äleumettık jelıde tarady.
Al marqūmdardy jerleu räsımıne auyl tūrǧyndary köptep jinalǧan.
Alǧaşqy boljam boiynşa, örtke üidegı elektr symdarynyŋ qysqa tūiyqtaluy sebep boluy mümkın. Qaiǧyly oqiǧaǧa bailanysty pıkır bıldırgen körşı Qaiyrbergen Boljymbetov jarylys dybysynyŋ estılmegenın aitty.
“Maǧan elektr symdary tūiyqtalyp, toqtan şyqqan boluy mümkın dedı. 12 adamnyŋ qaza tapqanyn, taǧy üşeuınıŋ auruhanada jatqanyn estıdım”, – deidı ol.
Körşılerdıŋ aituynşa, ekı qabatty üi otqa oranyp, tolyqtai janyp ketken. Otbasy būl üige üş jyl būryn köşıp kelgen. Äkelerı qaitys bolǧan soŋ, ülken ūl – 1994 jyly tuǧan Dauren öz janūiasymen osy üide tūrǧan. Onyŋ tört balasy bolǧan. Oqiǧa tünınde otbasynyŋ bır bölıgı toidan keiın üilerıne ketken, al ekınşı bauyrdyŋ otbasy sol tünı osy üide tünep qalǧan.
Tergeu barysynda erekşe nazar audarylyp otyrǧan jait – üidıŋ barlyq terezelerınıŋ temır tormen jabyluy. Būl faktor adamdardyŋ ört kezınde syrtqa şyǧuyna kedergı bolǧan-bolmaǧanyn mamandar anyqtaityn bolady. Körşılerdıŋ sözıne süiensek, şamamen taŋǧy 5-terde kömek sūraǧan aiqai estılgen.
“Üige barǧanymyzda lap etken otty kördık. Äiel adam aiqailaǧan siiaqty, bıraq tütınnen ulanyp qalǧan boluy mümkın…” – deidı közkörgender.
Qaiǧyly jaǧdai ornyna Ükımettık komissiiany bastap barǧan vise-premer Qanat Bozymbaev tiıstı organdarǧa örttıŋ naqty sebebın anyqtaudy tapsyrdy.
Auruhanaǧa tüsken üş adamnyŋ jaǧdaiy auyr. 1986 jyly tuǧan er adamnyŋ denesınıŋ 12 paiyzy küigen, ÖJJ apparatyna qosylǧan. 1991 jäne 2018 jyly tuǧan ekı zardap şeguşı de jansaqtau bölımınde jatyr. Olarǧa kömek körsetu üşın Şymkentten sanitarlyq aviasiia jıberıldı.
Vise-premer äkımdık pen Eŋbek ministrlıgıne qaza tapqandardyŋ otbasylaryna tolyq kölemde materialdyq kömek körsetudı tapsyrdy. Sondai-aq Densaulyq saqtau ministrlıgıne zardap şekkenderdıŋ jaǧdaiyn baqylauda ūstap, qajet bolǧan jaǧdaida Astanaǧa sanitarlyq aviasiiamen jetkızudı ūiymdastyru jükteldı. Işkı ıster ministrlıgıne tergeudı erekşe baqylauǧa alu tapsyryldy.
Tötenşe jaǧdailar ministrlıgı öŋır äkımdıkterımen bırge tūrǧyn üilerde, äsırese äleumettık osal toptar tūratyn baspanalarda, jataqhanalar men hostelderde ört qauıpsızdıgı boiynşa reidter jürgızudı bastaidy. Peşter men elektr jüielerındegı aqaular anyqtalsa, bırden joiyluǧa tiıs.
Qaiǧyly jaǧdai bükıl eldı töpegen qaraly habarǧa ainaldy.
