تۇركىستان وبلىسىندا ءوندىرىس پەن فارماتسەۆتيكا سالاسىن دامىتۋعا باعىتتالعان ءىرى ينۆەستيتسيالىق جوبا قولعا الىندى. ساۋران اۋدانىنداعى «Turan» ارنايى ەكونوميكالىق ايماعىنا قاراستى «وراڭعاي» قوسالقى ەكونوميكالىق ايماعىندا «Orzax Central Asia» جشس-ءنىڭ بيولوگيالىق بەلسەندى قوسپالار وندىرەتىن زاماناۋي زاۋىتىنىڭ ۋاقىت كاپسۋلاسى سالىندى.
جيىندا ءسوز سويلەگەن تۇركىستان وبلىسىنىڭ اكىمى نۇرالحان كوشەروۆ مەملەكەت باسشىسى قاسىم-جومارت توقاەۆتىڭ ەكونوميكانى ءارتاراپتاندىرۋ جانە يمپورتتى الماستىراتىن وندىرىستەردى دامىتۋ جونىندەگى تاپسىرمالارىن جۇزەگە اسىرۋ باعىتىندا وڭىردە جۇيەلى جۇمىستار اتقارىلىپ جاتقانىن اتاپ ءوتتى.
– مەملەكەت باسشىسى قاسىم-جومارت كەمەلۇلى ەل ەكونوميكاسىن ءارتاراپتاندىرىپ، يمپورت الماستىرۋشى ءوندىرىستى دامىتۋدى تاپسىردى. وسىعان وراي ءبىز ەكونوميكانىڭ شيكىزاتتىق مودەلىنەن بەت بۇرىپ، يمپورتتى الماستىرۋعا باعىتتالعان ناقتى جوبالاردى كەزەڭ-كەزەڭىمەن جۇزەگە اسىرۋدامىز. ناقتى مىسالمەن اتاپ وتسەم، وبلىستا ماقتا-توقىما، ەت، جۇگەرى جانە جيھاز كلاستەرلەرى دامىپ، جاڭا ءوندىرىس ورىندارى اشىلدى. جالپى يمپورتتى الماستىرۋعا باعىتتالعان كەشەندى جۇمىستاردىڭ ناتيجەسىندە 176 ملرد تەڭگەنى قۇرايتىن 31 جوبا ىسكە قوسىلدى. بيىل 280 ملرد تەڭگەگە 39 جوبا جۇزەگە اسىرىلۋدا. قوسىمشا نارىقتى زەرتتەي وتىرىپ، تۇركىستان وبلىسىندا فارماتسەۆتيكالىق ونىمدەردى تۇتىنۋ نارىعىنىڭ 100 ملرد تەڭگەگە جۋىعى يمپورتقا تاۋەلدى ەكەنىن انىقتادىق. مەملەكەت باسشىسىنىڭ تۇركيا رەسپۋبليكاسىنا جاساعان رەسمي ساپارى بارىسىندا قول جەتكىزىلگەن كەلىسىمدەردىڭ ناتيجەسىندە بۇگىن وسى زاماناۋي ءوندىرىستىڭ ىرگەتاسى قالانىپ وتىر. بۇل ەلىمىزدىڭ يمپورتقا تاۋەلدىلىگىن ازايتۋعا، ءوڭىر ەكونوميكاسىن نىعايتۋعا جانە حالىقتىڭ دەنساۋلىعىنا قاجەتتى ونىمدەردى وزىمىزدە وندىرۋگە باعىتتالعان ماڭىزدى قادام. دەنساۋلىققا قاجەتتى ونىمدەردى ءوز ەلىمىزدە ءوندىرۋ – ۇلتتىق قاۋىپسىزدىكتىڭ ماڭىزدى كەپىلى. جوبا تولىق ىسكە قوسىلعاندا 500-گە جۋىق جەرگىلىكتى تۇرعىن تۇراقتى جۇمىسپەن قامتىلادى. «Orzax Central Asia» كومپانياسى جۇزەگە اسىراتىن بۇل جوبا ءوڭىردىڭ ەكونوميكالىق الەۋەتىن ارتتىرىپ قانا قويماي، وتاندىق فارماتسەۆتيكا سالاسىن جاڭا دەڭگەيگە كوتەرەدى دەپ سەنەمىن. كومپانيا باسشىسى اليموگلۋ سەلمان مىرزاعا جانە ونىڭ كومانداسىنا ساتتىلىك تىلەيمىن. بارشاڭىزدى وسى ماڭىزدى باستامامەن شىن جۇرەكتەن قۇتتىقتايمىن، – دەدى نۇرالحان كوشەروۆ.
«Orzax Central Asia» جشس قۇرىلتايشىسى اليموگلۋ سەلمان قازاقستاندا، ونىڭ ىشىندە تۇركىستان وبلىسىندا ينۆەستيتسيالىق جوبانى جۇزەگە اسىرۋعا قولداۋ كورسەتكەن، قازاقستان ۇكىمەتىنە، ءوڭىر باسشىلىعىنا ريزاشىلىعىن ءبىلدىرىپ، زاۋىت قۇرىلىسى بەلگىلەنگەن مەرزىمدە اياقتالاتىنىن جەتكىزدى. تۇركىستاننىڭ تاريحي ماڭىزىنا توقتالىپ، بۇل جوبا ءوڭىردىڭ ەكسپورتتىق الەۋەتىن كوتەرەتىنىن ايتتى. سالتاناتتى راسىمدە زاۋىتتىڭ كاپسۋلاسى سالىندى.
«Orzax Central Asia» كومپانياسىنىڭ جوباسى ساۋران اۋدانىنداعى «Turan» ارنايى ەكونوميكالىق ايماعىندا جۇزەگە اسىرىلادى. كاسىپورىنعا 10 گەكتار جەر تەلىمى بولىنگەن. جوبانىڭ جالپى ينۆەستيتسيالىق قۇنى 20,4 ملرد تەڭگەنى قۇرايدى. قۇرىلىس جۇمىستارى 2026-2027 جىلدارى جۇرگىزىلەدى. زاۋىت تولىق ىسكە قوسىلعاننان كەيىن جىلىنا 464 ملن دانا بيولوگيالىق بەلسەندى قوسپا ءوندىرىپ، 500 ادامدى تۇراقتى جۇمىسپەن قامتاماسىز ەتەدى.
ايتا كەتەيىك، «Orzax Central Asia» جشس-ءنىڭ قۇرىلتايشىسى – تۇركياداعى بيولوگيالىق بەلسەندى قوسپالار ءوندىرىسى بويىنشا جەتەكشى كومپانيالاردىڭ ءبىرى سانالاتىن «Orzaks Pharmaceuticals and Chemical Industry Inc» كورپوراتسياسى. كورپوراتسيا بۇگىندە الەمنىڭ 50-دەن استام ەلىنە 150-دەن استام ءونىم ءتۇرىن ەكسپورتتايدى.
