كيەۆتەگى ازەربايجان ەلشىلىگىنە جاسالعان زىمىراندىق شابۋىل حالىقارالىق قوعامداستىقتىڭ نازارىن اۋداردى، دەپ حابارلايدى "ادىرنا" ۇلتتىق پورتالى.
ازەربايجان پرەزيدەنتى يلحام اليەۆ ۋكراينا پرەزيدەنتى ۆلاديمير زەلەنسكيمەن تەلەفون ارقىلى سويلەسىپ، بۇل ارەكەتتى قاتتى ايىپتادى. پرەزيدەنت حالىقارالىق قۇقىق نورمالارىنا سايكەس ديپلوماتيالىق مەكەمەلەرگە شابۋىل جاساۋ مۇلدە قابىلدانبايتىنىن اتاپ ءوتتى.
14 قاراشادا ازەربايجان سىرتقى ىستەر مينيسترلىگى باكۋدەگى رەسەي ەلشىسى ميحايل ەۆدوكيموۆتى شاقىرىپ، رەسمي نوتا تاپسىردى. مينيسترلىك حابارلاۋىنشا، "ەسكەندىر" ءتيپتى زىمىران ەلشىلىكتىڭ اۋماعىنا تيگەن. ناتيجەسىندە اۋماقتىڭ ءبىر بولىگى تولىق قيراپ، قىزمەتتىك كولىكتەر، اكىمشىلىك عيمارات جانە كونسۋلدىق ءبولىم زاقىمداندى. ازەربايجان تاراپى بۇل وقيعانى ايىپتاپ، حالىقارالىق قۇقىق نورمالارىنا قارسى دەپ مالىمدەدى.
بۇۇ باس حاتشىسى انتونيۋ گۋتەرريش شابۋىلعا قاتتى نارازىلىق ءبىلدىرىپ، ديپلوماتيالىق نىسانداردىڭ قورعالۋى قاجەت ەكەنىن ەسكە سالدى. ءباسپاسوز حاتشىسى ستەفان ديۋجارريك حابارلاعانداي، شابۋىلدار سالدارىنان كيەۆتە كەمىندە التى ادام، چەرنومورسك قالاسىندا ەكى ادام قازا تاۋىپ، كوپتەگەن بەيبىت تۇرعىندار زارداپ شەكتى. سونىمەن قاتار تۇرعىن ۇيلەر، ەنەرگەتيكالىق ينفراقۇرىلىم جانە ازەربايجان ەلشىلىگى زاقىمداندى.
«بۇل شابۋىلدار حالىقارالىق گۋمانيتارلىق قۇقىقتى بۇزادى. بەيبىت تۇرعىندارعا جانە ازاماتتىق ينفراقۇرىلىمعا جاسالعان كەز كەلگەن شابۋىل قابىلدانبايدى. قاقتىعىستار دەرەۋ توقتاتىلۋى ءتيىس»، — دەدى ديۋجارريك.
باس حاتشى ۋكرايناداعى ادىلەتتى جانە تۇراقتى بەيبىتشىلىككە جەتۋ ءۇشىن تولىق، بىردەن جانە شەكتەۋسىز اتىستى توقتاتۋعا شاقىرادى. سونىمەن قاتار، ول ۋكراينا سۋۆەرەنيتەتى، تاۋەلسىزدىگى جانە تەرريتوريالىق تۇتاستىعىن حالىقارالىق تانىلعان شەكارالار شەڭبەرىندە ساقتاۋدى قولدايتىنىن ايتتى.
