ۋكراينا رەسەيدىڭ ءتورت جىلعا جۋىق سوزىلعان شابۋىلىن توقتاتۋ ءۇشىن ۆاشينگتون ازىرلەگەن «بەيبىت جوسپاردىڭ» شارتتارىنا كەلىستى. بۇل تۋرالى Reuters اگەنتتىگى دەرەككوزدەرگە سىلتەمە جاساپ جازدى، دەپ حابارلايدى «ادىرنا» ءتىلشىسى.
«ۋكرايندار بەيبىت كەلىسىمگە كەلىستى. رەتتەۋدى قاجەت ەتەتىن ازداعان ەگجەي-تەگجەي قالدى»،- دەلىنگەن حابارلامادا.
ۋكراينا پرەزيدەنتىنىڭ ۇلتتىق قاۋىپسىزدىك جونىندەگى كەڭەسشىسى رۋستەم ۋمەروۆ تا قۇجاتتا «رەتتەۋدى قاجەت ەتەتىن كەيبىر ۇساق-تۇيەك تۇستار قالعانىن» اتاپ وتكەن.
وتكەن دەمالىس كۇندەرى جەنەۆادا اقش اسكەرىنىڭ ءمينيسترى دەن دريسكولل، مەملەكەتتىك حاتشى ماركو رۋبيو، ترامپتىڭ ارنايى وكىلى ستيۆ ۋيتكوفف، ترامپتىڭ كۇيەۋ بالاسى دجارەد كۋشنەر، سونداي-اق ۋكراينا مەن ەۋروپالىق وداقتاستاردىڭ ديپلوماتتارى قاتىسقان كەلىسسوزدەر وتكەن ەدى. ناتيجەسىندە تاراپتار «بەيبىت جوسپارعا» وزگەرىستەر ەنگىزىپ، 28 تارماقتىڭ ورنىنا 19 تارماق قالدىرعان.
Politico مالىمەتىنشە، جاڭارتىلعان قۇجاتتا دونباستى رەسەي باقىلاۋىنا بەرۋ تۋرالى شارت قايتا قارالعان. سونداي-اق ۋكراينانىڭ شەكاراسىنا قاتىستى «سەزىمتال ماسەلەلەر» كوتەرىلگەن.
Financial Times دەرەگىنشە، ۋكراينا اسكەر سانىن 800 مىڭ اداممەن شەكتەۋگە كەلىسىم بەرگەن. ال اقش جوسپارى بويىنشا اسكەر سانىن 600 مىڭعا دەيىن قىسقارتۋ ۇسىنىلعان ەدى. 2025 جىلدىڭ باسىندا زەلەنسكي ۋكراينا قارۋلى كۇشتەرىندە 880 مىڭ اسكەري قىزمەتكەر بولعانىن ايتقان ەدى.
