قاراعاندى وبلىسىنىڭ مەكتەپتەرىندە وقۋشىلار لوگيكالىق ويلاۋ مەن ستراتەگيالىق تالداۋدىڭ نەگىزدەرىن شاحمات ارقىلى ۇيرەنۋدە. «شاحمات نەگىزدەرى» ءپانى باستاۋىش سىنىپتاردىڭ وقۋ باعدارلاماسىنا ەنگىزىلىپ، بالالاردىڭ زەيىنىن، ەستە ساقتاۋ قابىلەتىن جانە اناليتيكالىق ويلاۋ داعدىلارىن دامىتۋعا باعىتتالعان. جوبا العاش رەت 2023 جىلى ءوڭىردىڭ بەس پيلوتتىق مەكتەبىندە ىسكە قوسىلىپ، 2025 جىلعا قاراي 90-عا جۋىق وقۋ ورنىن قامتىدى.
بۇگىندە شاحمات ساباقتارى تەك قالا مەكتەپتەرىندە عانا ەمەس، اۋىلدىق ەلدى مەكەندەردە دە وقىتىلادى — بۇل بالالارعا ينتەللەكتۋالدىق دامۋ ءۇشىن تەڭ مۇمكىندىك بەرەدى. بۇقار جىراۋ اۋدانىنىڭ پەتروۆكا اۋىلىنداعى الكەي مارعۇلان اتىنداعى مەكتەپتە بۇل ءپان ءۇشىنشى جىل قاتارىنان جۇرگىزىلىپ كەلەدى. مۇعالىم روزا احاتتىڭ ايتۋىنشا، وقۋشىلاردىڭ شاحماتقا قىزىعۋشىلىعى جىلدان جىلعا ارتىپ كەلەدى.
– شاحمات بالالاردى ويلانۋعا، سالىستىرىپ سارالاۋعا، لوگيكالىق قورىتىندى جاساۋعا ۇيرەتەدى. قازىر بىزدە ءۇش سىنىپتا ساباق وتەدى، جانە بالالار جاقسى ناتيجەلەر كورسەتىپ ءجۇر. وتكەن جىلى ولار قارقارالىدا وتكەن تۋرنيرگە قاتىسىپ، ال بيىل كۇزدە «اۋىل سپورت» وبلىستىق جارىسىندا ءبىرىنشى ورىن يەلەندى. ءۇش وقۋشى رەسپۋبليكالىق تۋرنيرگە جولداما الىپ، تاعى ەكەۋى ەكىنشى جانە ءۇشىنشى ورىندارعا يە بولدى، – دەدى پەداگوگ.
بالقاش قالاسىنداعى ساكەن سەيفۋللين اتىنداعى №7 مەكتەپ-گيمنازياسى دا 2023 جىلى جوبانىڭ پيلوتتىق قاتىسۋشىلارىنىڭ قاتارىندا بولدى. مۇندا شاحمات سىنىبى قازاقستان شاحمات فەدەراتسياسىنىڭ قولداۋىمەن تولىق جابدىقتالعان – تاقتالار، فيگۋرالار، دەمونستراتسيالىق ستەندتەر ورناتىلعان. بۇعان دەيىن مەكتەپتە ۇيىرمە بولعانىمەن، بالالار تەك دالىزدە ورنالاسقان ۇستەلدەردە وينايتىن. باستاۋىش سىنىپ مۇعالىمى ايمان يساباەۆا سول كەزدە شاحمات نەگىزدەرىن بىلەتىن جالعىز پەداگوگ بولعانىن ەسكە الادى.
– قازىر بىزدە توعىز سىنىپتا شاحمات ساباقتارى وتكىزىلەدى. الدىمەن ويىننىڭ نەگىزدەرىن – ەرەجەلەرىن، فيگۋرالاردىڭ اتاۋى مەن ءجۇرىسىن، قاراپايىم كومبيناتسيالار مەن تاكتيكالىق تاسىلدەردى ۇيرەتەمىز. ۇلكەن سىنىپتاردا وقۋشىلار شاحماتتىق ەسەپتەر شىعارىپ، گروسسمەيستەرلەردىڭ پارتيالارىن تالدايدى، ستراتەگيالاردى مەڭگەرەدى. بۇل ويىن بالالاردىڭ زەيىنىن، ەستە ساقتاۋ قابىلەتىن، لوگيكاسىن دامىتىپ، ويدى جۇيەلى قۇرۋعا جانە الدىن الا جوسپارلاۋعا باۋليدى. مۇنداي داعدىلار اسىرەسە ماتەماتيكا ساباقتارىندا ۇلكەن كومەك بەرەدى، – دەيدى ۇستاز.
بۇگىندە «شاحمات» ءپانى قازاق جانە ورىس تىلدەرىندە ءبىلىم بەرەتىن 195 سىنىپتا ەنگىزىلگەن، ونى ءتورت مىڭعا جۋىق وقۋشى وقىپ ءجۇر. باستاۋىش سىنىپ مۇعالىمدەرى ءۇشىن قازاقستان شاحمات فەدەراتسياسى ۇيىمداستىراتىن تەگىن بىلىكتىلىكتى ارتتىرۋ كۋرستارى تۇراقتى وتكىزىلەدى. وقىتۋ جىلىنا ەكى رەت — وفلاين جانە ونلاين فورماتتاردا جۇرگىزىلەدى.
مەكتەپتەردى قاجەتتى وقۋ قۇرالدارىمەن قامتۋ كەشەندى تۇردە جۇزەگە اسۋدا: شاحمات تاقتالارى، فيگۋرالار، دەمونستراتسيالىق جيىنتىقتار مەن ادىستەمەلىك ماتەريالدار ساتىپ الىنىپ جاتىر.
بۇل جۇمىس وبلىستىق جانە جەرگىلىكتى بيۋدجەتتەر، سونداي-اق قازاقستان شاحمات فەدەراتسياسىنىڭ قولداۋىمەن جۇرگىزىلۋدە.
