الماتى وبلىسىندا ۇيىنەن كەتكەن 17 جاستاعى ياسمينا ءبىر جارىم ايدان كەيىن قاراعاندى قالاسىنداعى جەكەمەنشىك بالاباقشادان تابىلدى، دەپ حابارلايدى “ادىرنا” كتك-عا سىلتەپ.
ءجاسوسپىرىم اتالعان مەكەمەدە جۇمىس ىستەپ جۇرگەن.
ياسمينا ۇيىنەن اتا-اناسى ۇيىقتاپ جاتقان كەزدە كەتكەن. ارنايى كوميسسيا ءجاسوسپىرىمنىڭ ۇيدەن كەتۋ سەبەپتەرىن انىقتاۋ ءۇشىن جۇمىس جۇرگىزگەن. قىزدىڭ ايتۋىنشا، ول ءوز بەتىنشە ءومىر ءسۇرىپ كورۋ ءۇشىن ۇيدەن كەتكەن. اتا-اناسى وقۋىن جالعاستىرعانىن قالاعانىمەن، ونىڭ وقۋعا دەگەن ىنتاسى بولماعان.
ءبىر جارىم ايدان كەيىن ياسمينا اتا-اناسىمەن ءوزى بايلانىسقا شىققان. قازىر ول وتباسىنا ورالعان.
«وزىمنەن دە قاتەلىك بولدى. حابارلاسقىم كەلىپ ءجۇردىم. ساعىنىپ، ىشىمنەن قينالىپ ءجۇردىم. ەفيردى كورگەننەن كەيىن حابارلاسۋعا تۇرتكى بولدى. قازىر جاعدايىم جاقسى، اتا-اناممەن تۇرعىم كەلەدى»، — دەدى ياسمينا.
قازىر جاسوسپىرىممەن پسيحولوگتار جۇمىس ىستەپ جاتىر. ول بولاشاقتا تىگىنشى بولۋدى ارماندايتىنىن ايتقان. ماماندار قىزعا قاجەتتى قۇرال-جابدىقتاردى الىپ بەرۋگە جانە جوعارى ءبىلىم الۋىنا جاعداي جاساۋعا ۋادە بەرگەن.
قازىر زاڭدى وكىلدەرمەن جانە قۇقىق قورعاۋ ورگاندارىمەن بىرلەسىپ پروفيلاكتيكالىق جۇمىستار جۇرگىزىلىپ جاتىر. پسيحولوگيالىق كومەك كورسەتۋ دە جالعاسادى.
