قازنەتتە قاراعاندى تۇرعىنى اليكا مۇحاماديەۆانىڭ جەلىدە جاريالاعان جازباسىنا قاتىستى ۇلكەن داۋ تۋدى، دەپ حابارلايدى «ادىرنا» ءتىلشىسى.
ول Threads جەلىسىندەگى «قازاقستان نەمەن تانىمال؟» دەگەن جازبانىڭ استىنا «مامبەتامي» دەپ جاۋاپ قالدىرعان.
ودان بولەك، قازاق تىلىندە سويلەۋدى تالاپ ەتەتىندەردى مازاق ەتىپ، مەملەكەتتىك ءتىلدى «پولۋكالبيتسكي ديالوگ» دەپ كەلەمەجدەگەن.
ال تاعى ءبىر جازباعا «سەندەر، مۇسىلماندار، كوپشىلىگىڭىز — ناعىز دوڭىزسىڭدار. دارەتحانادا سەندەردەن كەيىن ءبارى سۋ بولىپ جاتادى. شارشاتتىڭدار! ۇيلەرىڭىزدە وتىرىڭىزدارشى، مۇلدەم سىرتقا شىقپاي-اق قويىڭىزدار!» دەگەن.
قاراعاندىلىق ارۋدىڭ بۇل پىكىرلەرى كوپشىلىكتىڭ اشۋ-ىزاسىن تۋعىزدى. جەلى قولدانۋشىلارى ونى ۇلتارالىق ارازدىقتى قوزدىرعانى ءۇشىن جاۋاپقا تارتۋعا شاقىرىپ، ۇستىنەن پوليتسياعا ارىز جازعاندارىن جەتكىزدى.
اليكا مۇحاماديەۆا Threads-تەگى پاراقشاسىن ءوشىرىپ، Instagram جەلىسىندە قازاقستاندىقتاردان كەشىرىم سۇرادى.
«ايتقان سوزىمە قاتتى وكىنەمىن. ءبىر ءتۇن بويى كوز ىلمەي، سىزدەردى قانشالىقتى رەنجىتكەنىمدى ويلادىم. قازاقستان – مەنىڭ تۋعان ەلىم. دوستارىم، سەرىكتەستەرىم مەن ارىپتەستەرىمنىڭ اراسىندا قازاقتار دا بار. مەن ەشكىمدى رەنجىتكىم كەلگەن جوق، ايتقان سوزدەرىم كونتەكستەن جۇلىنىپ الىنعان، مۇنى Stories-تە دالەلدەيمىن. قازىر تۋىستارىم ءۇشىن قورقامىن. ءتۇرلى قوقان-لوققى جاسالىپ جاتىر. بارلىق كىنا وزىمنەن ەكەنىن ءتۇسىندىم. مەنى كەشىرىڭىزدەر»، — دەدى ول.
كەيىننەن جۋرناليست سىرىم يتقۇلوۆ قاراعاندىلىق كاسىپكەردىڭ ۋاقىتشا ۇستاۋ يزولياتورىنا قامالعانىن ايتتى. ازىرگە پوليتسيا دەپارتامەنتى بۇل وقيعاعا قاتىستى تۇسىنىكتەمە بەرمەدى.
ايتا كەتەيىك، قىلمىستىق كودەكستىڭ 174-بابى («الەۋمەتتىك، ۇلتتىق، رۋلىق، ناسىلدىك، تاپتىق جانە ءدىني ارازدىقتى قوزدىرۋ») بويىنشا ايىپپۇل سالۋ، بوستاندىعىن شەكتەۋ نەمەسە جەتى جىلعا دەيىن باس بوستاندىعىنان ايىرۋ جازاسى قاراستىرىلعان.
بۇعان دەيىن سولتۇستىك قازاقستان وبلىسىندا 35 جاستاعى جۇكتى مۇعالىم جانسۇلۋ دارحامباەۆا ورىس ۇلتىنا ءتىل تيگىزگەنى ءۇشىن ەكى جىل باس بوستاندىعىنان ايىرىلعان ەدى.
