رەسەي پرەزيدەنتى ۆلاديمير پۋتين استانادا ءوتىپ جاتقان شانحاي ىنتىماقتاستىق ۇيىمىنىڭ (شىۇ) سامميتىنە كەلدى، دەپ حابارلايدى “ادىرنا” ۇلتتىق پورتالى كرەملدىڭ ءباسپاسوز قىزمەتىنە سىلتەپ.
«رەسەي پرەزيدەنتى قازاقستاننىڭ ەلورداسى استاناعا شىۇ-عا مۇشە مەملەكەتتەر باسشىلارى كەڭەسىنىڭ وتىرىسىنا قاتىسۋ ءۇشىن كەلدى. 3-4 شىلدەدە شىۇ-عا مۇشە ەلدەردىڭ باسشىلارى ۇيىم اياسىنداعى كوپ قىرلى ىنتىماقتاستىقتى ودان ءارى تەرەڭدەتۋ جانە ونىڭ قىزمەتىن جەتىلدىرۋدىڭ جاي-كۇيى مەن پەرسپەكتيۆالارىن تالقىلايدى. اعىمداعى حالىقارالىق جانە وڭىرلىك ماسەلەلەر بويىنشا پىكىر الماسۋ بولادى. كەزدەسۋ قورىتىندىسى بويىنشا استانا دەكلاراتسياسىنا جانە باسقا دا بىرلەسكەن قۇجاتتارعا قول قويىلادى»، - دەلىنگەن سارسەنبى كۇنى تاراتقان حابارلامادا.
اۋەجايدا رەسەي فەدەراتسياسىنىڭ پرەزيدەنتى ۆلاديمير ءپۋتيندى قازاقستان رەسپۋبليكاسىنىڭ پرەمەر-ءمينيسترى ولجاس بەكتەنوۆ قارسى الدى.
اتاپ وتكەندەي، «شىۇ پليۋس» فورماتىندا كەزدەسۋ جوسپارلانىپ وتىر، وعان شىۇ-نىڭ باقىلاۋشىلارى مەن ديالوگتىق سەرىكتەستەرى، ياعني مەملەكەتتەردىڭ باسشىلارى، حالىقارالىق ۇيىمداردىڭ باسشىلارى مەن قازاقستاندىق توراعالىق قوناقتارى شاقىرىلادى.
«استانادا رەسەي فەدەراتسياسىنىڭ پرەزيدەنتى سامميتكە قاتىسۋشى مەملەكەت باسشىلارىمەن بىرقاتار ماڭىزدى ەكىجاقتى كەلىسسوزدەر وتكىزۋدى دە جوسپارلاپ وتىر»، - دەلىنگەن حابارلامادا.
ەسكە سالا كەتەيىك، 2 شىلدە كۇنى استانا قالاسىنا قحر توراعاسى سي تسزينپين مەملەكەتتىك ساپارمەن كەلگەن بولاتىن. توراعانى اۋەجايدان مەملەكەت باسشىسى قاسىم-جومارت توقاەۆ قارسى الدى.
