اباي وبلىسىنىڭ اكىمى بەرىك ءۋالي وڭىردە ۋاقىت بەلدەۋىنىڭ وزگەرۋىنە بايلانىستى جاپپاي نارازىلىقتار تىركەلمەگەنىن مالىمدەدى، دەپ حابارلايدى "ادىرنا" ۇلتتىق پورتالى.
اكىمنىڭ ايتۋىنشا، مەكتەپتەر مەن اۋرۋحانالار تاڭعى ساعات 8:00-دە جۇمىسىن باستايدى، ال كەيبىر مەملەكەتتىك قىزمەتكەرلەر بۇدان ەرتەرەك كىرىسەدى.
"مەن اپپاراتتاعى قىزمەتكەرلەرگە جۇمىس كەستەسىن رەتتەۋدى ۇسىندىم، بىراق ولار اشىق تۇردە قوسىمشا جۇمىس ىستەگىسى كەلمەيتىنىن ايتتى. ولارعا ساعات 8-دەن 5-كە دەيىن جۇمىس ىستەۋ ىڭعايلى", - دەدى بەرىك ءۋالي.
جۋرناليستەر اكىمنەن تۇرعىنداردىڭ بۇل وزگەرىسكە قانشالىقتى كەلىسەتىنى جونىندە سۇراعان كەزدە، ول:
"كىم سويلەسكىسى كەلسە، مەن دايىنمىن. كەلىسىمگە كەلۋگە ءازىرمىن", - دەپ جاۋاپ بەردى.
ەسكە سالا كەتەيىك، 2024 جىلدىڭ ناۋرىزىندا قازاقستان بىرىڭعاي UTC+5 ۋاقىت بەلدەۋىنە ءوتتى. بيلىك بۇل شەشىمدى بيولوگيالىق ىرعاقتى قالپىنا كەلتىرۋ، بيزنەس-پروتسەستەر مەن كولىك قاتىناسىن وڭتايلاندىرۋ ماقساتىندا قابىلداعانىن تۇسىندىرگەن.
دەگەنمەن، ەلدىڭ شىعىس جانە سولتۇستىك ايماقتارىندا كەيبىر تۇرعىندار كۇننىڭ تىم ەرتە شىعۋى مەن قىس مەزگىلىندە ەرتە قارايۋىنا شاعىمدانعان. ال 2025 جىلدىڭ قاڭتارىنان باستاپ شىعىس قازاقستان وبلىسىنىڭ بىرنەشە اۋدانىندا جاڭا جۇمىس كەستەسى پيلوتتىق جوبامەن ەنگىزىلدى.
