19 تامىز كۇنى شامامەن ساعات 16:00-دە اباي وبلىسى ءۇرجار اۋدانىنىڭ بەستەرەك اۋىلىندا كولىك قاققاننان ءۇش بالا قازا تاپتى، دەپ حابارلايدى "ادىرنا" ۇلتتىق پورتالى.
الدىن الا مالىمەت بويىنشا، 55 جاستاعى كولىك جۇرگىزۋشىسى رولگە يە بولا الماي، ءۇيدىڭ قاقپاسىنىڭ الدىندا، جولدان 10 مەتر قاشىقتىقتا تۇرعان بالالاردى قاعىپ كەتكەن.
وقيعا سالدارىنان ەكى بالا وقيعا ورنىندا قازا تاپتى، تاعى ءبىرى مەديتسينالىق مەكەمەگە بارار جولدا كوز جۇمدى. ءۇش بالا ءتۇرلى جاراقاتپەن اۋرۋحاناعا جەتكىزىلدى. اباي وبلىسىنىڭ دەنساۋلىق ساقتاۋ باسقارماسىنىڭ حابارلاۋىنشا، ولاردىڭ جاعدايى اۋىر، بارلىق قاجەتتى مەديتسينالىق كومەك كورسەتىلۋدە.
پرەزيدەنت قاسىم-جومارت توقاەۆتىڭ تاپسىرماسىمەن زارداپ شەككەن بالالارعا كومەك كورسەتۋ ءۇشىن قورعانىس مينيسترلىگىنىڭ س-295 اسكەري-كولىك ۇشاعى قۇرامىندا رەانيماتولوگ، نەيروحيرۋرگ جانە تراۆماتولوگ بار مەديتسينالىق بريگادامەن بىرگە ءۇرجار اۋدانىنا ۇشىپ كەلدى.
اباي وبلىسىنىڭ اكىمى بەرىك ءۋاليدىڭ تاپسىرماسىمەن قازا بولعان بالالاردىڭ وتباسىلارىنا جەرلەۋ ءراسىمىن ۇيىمداستىرۋدا بارلىق قاجەتتى قولداۋ، سونداي-اق پسيحولوگيالىق جانە ماتەريالدىق كومەك كورسەتىلەدى.
پوليتسيا مالىمەتىنشە، جۇرگىزۋشى ۇستالىپ، ۋاقىتشا ۇستاۋ يزولياتورىنا قامالدى. مەديتسينالىق ساراپتاما ونىڭ اپات كەزىندە ماس بولماعانىن كورسەتتى. قىلمىستىق ءىس قوزعالدى. قازىرگى ۋاقىتتا وقيعانىڭ سەبەبى مەن ءمان-جايىن انىقتاۋعا باعىتتالعان بارلىق تەرگەۋ شارالارى جۇرگىزىلۋدە.
