سەمەيدە 11 ادام ەرتىس وزەنىندە سۋ دەڭگەيىنىڭ كوتەرىلۋىنە بايلانىستى قاۋىپسىز جەرگە كوشىرىلدى، دەپ حابارلايدى "ادىرنا" ءتىلشىسى قازاقپاراتقا سىلتەپ.
سەمەي قالاسى بەيبىتشىلىك ارالىندا تۇراتىن 11 ادام ەۆاكۋاتسيالاندى. سەبەبى ەرتىس وزەنىندە سۋ دەڭگەيى – 457 سم.
بەيبىتشىلىك ارالى تۇرعىندارىنىڭ قاۋىپسىزدىگىن قامتاماسىز ەتۋ ماقساتىندا تجد، جەرگىلىكتى اتقارۋشى ورگان جانە 68303 اسكەري ءبولىمىنىڭ قىزمەتكەرلەرى بىرلەسىپ، 21 قاڭتارعا قاراعان ءتۇنى بوگەت سالۋ، وزەن ارناسىنا سۋ بۇرۋ ءۇشىن جول توسەمىن اشۋ جۇمىستارىن جۇرگىزدى.
«تۇندە بەيبىتشىلىك ارالىنان 11 ادام، ونىڭ ىشىندە 3 بالا ەۆاكۋاتسيالاندى. ولار سەمەي قوناق ۇيىنە ورنالاستىرىلدى. ازاماتتاردى جەرگىلىكتى اتقارۋشى ورگاندار ىستىق تاماقپەن قامتاماسىز ەتتى. ءۇي جانۋارلارى دا قاۋىپسىز جەرگە جەتكىزىلگەن»، - دەپ حابارلادى اباي وبلىسىنىڭ اكىمدىگى.
دەگەنمەن، تۇرعىن ۇيلەردى سۋ باسۋ قاۋپى جوق. قۇزىرلى ورگان قىزمەتكەرلەرى ۋچاسكەلەردى ءجىتى باقىلاپ، سۋ دەڭگەيىنە مونيتورينگ جۇرگىزۋدە. ال ەرتىس وزەنىنىڭ سۋ دەڭگەيى ءاربىر 2 ساعات سايىن ولشەنۋدە.
