اتىراۋداعى جەكە ستوماتولوگيالىق كلينيكالاردىڭ بىرىندە ءتىس ەمدەۋ كەزىندە كۇتپەگەن جاعداي ورىن الدى. دارىگەر ءتىس ەمدەۋ بارىسىندا قولدانىلاتىن مەتالل قوندىرمانى ابايسىزدا پاتسيەنتتىڭ اۋزىنا ءتۇسىرىپ العان، ال ايەل ونى بايقاماي جۇتىپ قويعان، دەپ حابارلايدى "ادىرنا".
زارداپ شەككەن ايەلدىڭ ايتۋىنشا، دارىگەر العاشقى ساتتە جەدەل جاردەم شاقىرماي، قۇسىق تۋدىرۋ ارقىلى قوندىرمانىڭ وزدىگىنەن شىعۋىن ۇسىنعان. بىراق بۇل ارەكەت ناتيجە بەرمەگەن سوڭ، ناۋقاس ءوز بەتىمەن وبلىستىق اۋرۋحانانىڭ جاراقات پۋنكتىنە جۇگىنۋگە ءماجبۇر بولعان.
دارىگەرلەر ناۋقاسقا رەنتگەن جانە گاستروسكوپيا جاساپ، اسقازاننان بوگدە زاتتى انىقتاعان. ارنايى مەديتسينالىق قىسقاش ارقىلى مەتالل قوندىرما تابىستى تۇردە الىنعان.
پاتسيەنت كەيىن e-ءوتىنىش پورتالى ارقىلى وبلىستىق دەنساۋلىق ساقتاۋ باسقارماسىنا شاعىم تۇسىرگەن. الايدا ۆەدومستۆو بۇل جاعداي ءوز قۇزىرەتىنە كىرمەيتىنىن، سەبەبى كلينيكا جەكەمەنشىك نىسان ەكەنىن مالىمدەدى.
اتىراۋ وبلىستىق ستوماتولوگتار قاۋىمداستىعىنىڭ ۇيلەستىرۋ كەڭەسىنىڭ توراعاسى قۇرال تيشباەۆ وقيعاعا بايلانىستى پىكىر ءبىلدىرىپ، دارىگەردىڭ ارەكەتىن ورىنسىز دەپ باعالادى:
«دارىگەردىڭ مانيپۋلياتسيانى جالعاستىرىپ، 103 قىزمەتىن شاقىرماۋى – ورەسكەل قاتەلىك. ءتىپتى زات كىشكەنتاي بولسا دا، مۇنداي جاعدايدا ناۋقاسقا دەرەۋ كومەك شاقىرىلۋى ءتيىس. ۇشتىقتىڭ اقاۋى بولىپ، سودان بۇرعى ءتۇسىپ كەتكەن بولۋى مۇمكىن»، — دەدى ول.
قازىرگى تاڭدا پاتسيەنت ءوز شاعىمىنا رەسمي جاۋاپ كۇتۋدە.
