فوتو: بەينەدەن سكرين
تەمىرتاۋ ماڭىنان ەكى اي بۇرىن ءىز-ءتۇزسىز جوعالعان 38 جاستاعى ايەلدىڭ بولشەكتەلگەن ءمايىتى تابىلدى، دەپ حابارلايدى “ادىرنا”.
كتك دەرەگىنشە، ونى ءولتىردى دەگەن كۇدىكپەن بىرگە تۇرعان 40 جاستاعى ەر ادام ۇستالدى.
ارنا مالىمەتىنشە، يرينا كەرن 20 قىركۇيەكتە جوعالىپ كەتكەن. الدىن الا مالىمەت بويىنشا، سول كۇنى ول كۇيەۋىمەن جانجالداسىپ، ۇيدەن شىعىپ كەتكەن. ايەلدى ىزدەۋگە ەرىكتىلەر مەن اسكەري قىزمەتكەرلەر جۇمىلدىرىلدى. ولار قىزمەتتىك يتتەردىڭ كومەگىمەن ورمان القاپتارىن، ساياجايلاردى جانە زيراتتاردى تەكسەرگەن. الايدا ىزدەۋ جۇمىستارى ناتيجە بەرمەدى.
ايەلمەن بىرگە تۇرعان ازامات ونىڭ ۇيدەن ءجيى كەتىپ قالاتىنىن ايتقان. ءتىپتى ىزدەۋ جۇمىستارىنا ءوزى دە قاتىسقان. كەيىن ەر ادامنىڭ وسى ىسكە قاتىسى بار دەگەن كۇدىككە ىلىنگەنى بەلگىلى بولدى.
مارقۇمنىڭ دەنە قالدىقتارى تەمىرتاۋدان 22 شاقىرىم جەردەگى شيپاجاي اۋماعىنان تابىلعان. كۇدىكتى اتالعان مەكەمەدە وت جاعۋشى بولىپ جۇمىس ىستەگەن. ايەلدىڭ ارتىندا ءۇش بالاسى قالدى. كەنجە بالاسى – ءۇش جاستا.
«قىلمىسقا قاتىسى بار دەگەن كۇدىكپەن 40 جاستاعى ەر ادامدى انىقتاپ، ۇستادىق. ول ۋاقىتشا ۇستاۋ يزولياتورىنا قامالدى. اتالعان فاكتى بويىنشا قىلمىستىق ءىس قوزعالدى»، – دەدى تەمىرتاۋ قالالىق پوليتسيا باسقارماسىنىڭ باستىعى تالعات باكاەۆ.
پوليتسيا مالىمەتىنشە، ءمايىتتى قاراۋ كەزىندە زورلىق-زومبىلىق بەلگىلەرى انىقتالعان.
