ۋگاندا پرەزيدەنتىنىڭ ۇلى ءارى ەل ارمياسىنىڭ قولباسشىسى مۋحۋزي كاينەرۋگابا X الەۋمەتتىك جەلىسىندەگى جازباسىنان كەيىن جانجالدىڭ ورتاسىندا قالدى، دەپ حابارلايدى «ادىرنا» ءتىلشىسى.
India Today باسىلىمىنىڭ مالىمەتىنشە، 11 ساۋىردە گەنەرال تۇركيادان «ديۆيدەند» رەتىندە 1 ملرد دوللار تالاپ ەتىپ، سونىمەن بىرگە ەلدىڭ «ەڭ سۇلۋ ايەلىن» وزىنە ايەلدىككە بەرۋدى سۇراعان. كەيىن ول جازباسىن وشىرگەنىمەن، سكرينشوتىن ءۇندى باسىلىمى ساقتاپ، جاريالاعان.
كاينەرۋگابا بۇل تالاپتارىن سوماليدەگى جاعدايمەن بايلانىستىرعان. ونىڭ ايتۋىنشا، انكارا بۇل ەلدەگى ينفراقۇرىلىم جوبالارىنان، سونداي-اق موگاديشوداعى پورتتار مەن اۋەجايلاردى باسقارۋدان پايدا كورىپ وتىر. ال ۋگاندا افريكا وداعى ميسسيالارىنا قاتىسىپ، «اش-شاباب» ء(ال-كايدامەن بايلانىستى توپ – رەد.) سودىرلارىنا قارسى كۇرەسكە جۇمىلدىرىلعان. وسىعان بايلانىستى گەنەرال «باعالى قاعازداردى ساتۋدان ديۆيدەند العىسى كەلەتىنىن» مالىمدەگەن.
كاينەرۋگابا تالاپتار ورىندالماسا، ۋگاندانىڭ Turkish Airlines اۋە كومپانياسىنىڭ ۇشاقتارىنا ءوز اۋە كەڭىستىگىن جاباتىنىن جانە انكارامەن ديپلوماتيالىق قاتىناستى ۇزەتىنىن ايتقان.
«تۇركيا ءۇشىن بۇل وتە قاراپايىم مامىلە… نە ولار بىزگە تولەيدى، نە مەن ولاردىڭ مۇنداعى ەلشىلىگىن جابامىن. ولار دا جاۋاپ رەتىندە ءبىزدىڭ تۇركياداعى ەلشىلىگىمىزدى جابا الادى. ەشقانداي ماسەلە جوق»،- دەپ جازدى ول X جەلىسىندە.
گەنەرال تالاپتارىن ورىنداۋعا 30 كۇن بەرىپ، «سەنى ۇنەمى ساتىپ كەتەتىن دوس كىمگە كەرەك؟» دەپ قوسقان. سونداي-اق ول ۋگاندا ازاماتتارىنا «قاۋىپسىزدىك ءۇشىن تۇركياعا بارۋدان باس تارتۋعا» كەڭەس بەرگەن.
ايتا كەتەيىك، مۋحۋزي كاينەرۋگابانىڭ تۇركياعا باعىتتالعان قاتاڭ مالىمدەمەلەرى جايدان-جاي شىقپاعان. PA Turkey جازۋىنشا، انكارامەن قارىم-قاتىناستىڭ ناشارلاۋىنا ءۇش نەگىزگى سەبەپ بار:
1. تۇركيادا تۇراتىن ۋگاندالىق وپپوزيتسيونەر ءارى يۋتۋبەر فرەد لۋمبۋە ءىسى. ۋگاندا ونى ەكستراديتسيالاۋدى تالاپ ەتەدى، بىراق انكارا قۇقىقتىق راسىمدەر مەن ادام قۇقىقتارى ماسەلەلەرىنە سۇيەنىپ، باس تارتىپ وتىر.
2. تۇرىكتىڭ Yapi Merkezi كومپانياسى قاتىسقان 2,2 ملرد دوللارلىق تەمىرجول جوباسىنىڭ توقتاۋى. ۋگاندا بيلىگى قارجىلاندىرۋ ماسەلەلەرىن العا تارتىپ، كەلىسىمنەن شىققان.
3. تۇركيانىڭ ايماقتا، اسىرەسە سومالي مەن ەفيوپيامەن بايلانىس ارقىلى ىقپالىنىڭ كۇشەيۋى. كامپالا مۇنى ۋگاندانىڭ ءداستۇرلى مۇددەلەر ايماعىنا ارالاسۋ رەتىندە قابىلدايدى.
ازىرگە ەكى ەل اراسىنداعى ساۋدا جالعاسۋدا، تۇرىك كومپانيالارى ۋگاندادا جۇمىس ىستەپ تۇر. بىراق جۋرناليستەردىڭ ايتۋىنشا، قارىم-قاتىناس بۇرىنعىعا قاراعاندا ايتارلىقتاي سالقىنداعان.
كاينەرۋگابا بۇعان دەيىن دە جازبالارىمەن حالىقارالىق رەزونانس تۋعىزعان ەدى. 2022 جىلى ول يتاليا پرەمەر-ءمينيسترى دجوردجا مەلونيگە ۇيلەنۋ ءۇشىن ايىرباس رەتىندە انكولە تۇقىمدى 100 سيىر ۇسىنعان.
«ەگەر ريمدىكتەر ءبىزدىڭ سيىرلاردان باس تارتسا، وندا ءبىز ءريمدى باسىپ الۋىمىز كەرەك. بۇعان بىزگە بىرنەشە كۇن عانا قاجەت»، — دەپ جازعان باسشى.
سونداي-اق ول كەنياعا باسىپ كىرۋمەن قورقىتقان. وسىدان كەيىن اكەسى — پرەزيدەنت يوۆەري مۋسەۆەني كوپشىلىك الدىندا كەشىرىم سۇراۋعا ءماجبۇر بولدى.
