سەنات وتىرىسىندا سەناتور اندرەي لۋكين قازاقستان قارۋلى كۇشتەرىندەگى ءتارتىپ پەن اسكەري پوليتسيانىڭ جۇمىسىن رەتتەيتىن زاڭنامانى قايتا قاراۋ قاجەتتىگىن ايتتى، دەپ حابارلايدى "ادىرنا" ۇلتتىق پورتالى.
سەناتوردىڭ سوزىنشە، اسكەري ءتارتىپ — ەلدىڭ قورعانىس قابىلەتىنىڭ نەگىزى.
ول جەكە قۇرامنىڭ مورالدىق جاعدايىنا، جاۋاپكەرشىلىك دەڭگەيىنە جانە جاۋىنگەرلىك تاپسىرمالاردى ورىنداۋ قابىلەتىنە تىكەلەي اسەر ەتەدى. الايدا قازىرگى قولدانىستاعى نورمالار زامان تالابىنا ساي ەمەس.
«قابىلدانىپ جاتقان شارالارعا قاراماستان، جۇيەلى پروبلەمالار ساقتالىپ وتىر. بولىمنەن ءوز بەتىنشە كەتۋ، جارعىدان تىس ارەكەتتەر، سىبايلاس جەمقورلىق بەلگىلەرى سياقتى قۇقىق بۇزۋشىلىقتار بار. الدىن الۋ شارالارىنىڭ تيىمدىلىگى تومەن، اسكەري پوليتسيا، پروكۋراتۋرا مەن قولباسشىلىق اراسىنداعى ۇيلەستىرۋ ءالسىز. بۇل قۇقىقتىق بازانىڭ جەتكىلىكسىزدىگىن كورسەتەدى»، — دەدى سەناتور لۋكين.
ول اسكەري پوليتسيا مەن قولباسشىلىق قىزمەتىن رەتتەيتىن ەرەجەلەردىڭ ءبىر بولىگى ەسكىرگەنىن ايتىپ، زاڭنامانى جاڭارتۋدى ۇسىندى.
«اسكەري پوليتسيا، قولباسشىلىق جانە قۇقىق قورعاۋ ورگاندارىنىڭ فۋنكتسيالارىن ناقتى اجىراتۋ قاجەت. سونداي-اق ءتارتىپ بۇزۋشىلىقتاردى باقىلاۋعا تسيفرلىق جۇيەلەردى ەنگىزۋ، اسكەري بولىمنەن ءوز ەركىمەن كەتۋ ءۇشىن جاۋاپكەرشىلىكتى قاتاڭداتۋ كەرەك. بۇدان بولەك، اسكەري پسيحولوگتاردى دايارلاۋ مەن سەرتيفيكاتتاۋ ستاندارتتارىن بەكىتۋ جانە ءسۋيتسيدتىڭ الدىن الۋ بويىنشا ۆەدومستۆوارالىق باعدارلاما ازىرلەۋ ماڭىزدى»، — دەدى دەپۋتات.
سەناتوردىڭ پىكىرىنشە، بۇل شارالار قارۋلى كۇشتەردەگى ءتارتىپتى نىعايتىپ قانا قويماي، قوعامنىڭ اسكەرگە دەگەن سەنىمىن ارتتىرادى جانە ۇلتتىق قاۋىپسىزدىكتى قامتاماسىز ەتۋگە ىقپال ەتەدى.
